Yeniyetmə şahmatçılarımız Avropa çempionatında uğurlu çıxış edir

Türkiyənin Konya şəhərində keçirilən 7-17 yaşlı məktəblilər arasında Avropa çempionatında 5-ci turun oyunları yekunlaşıb. Azerisport.az xəbər verir ki, çempionatda ümumilikdə 670 şahmatçı mübarizə aparır. Ölkəmizi müxtəlif yaş qruplarında 35 şahmatçı təmsil edir. Təmsilçilərimizin yarışda uğurla çıxışı davam edir.

5 turdan sonra 7 yaşlı oğlanlar arasında həmyerlimiz Emin Əhmədov 5 oyundan 5 xal toplayaraq liderdir. Nicat Mansurov isə 4 xalla 3-8-ci yerləri yerləri bölüşdürərək, əlavə göstəricilərə görə 5-ci yerdədir. Eyni yaşlı qızların çempionatında isə Qönçə Səfərova 4 xal toplayaraq ilk beşlikdə qərarlaşıb.

9 yaşlı oğlanların çempionatında təmsilçimiz Süleyman Süleymanlı 4.5 xal toplayaraq 4-cü yerdədir. Alperen Kanlı və Sənan Xudiyev isə 4 xal toplayaraq 5-6-cı yerləri bölüşdürür. Fərhad Məmmədəliyev də 4 xal toplayaraq ilk onluqdadır.

Xəzər Babazadə 11 yaşlı oğlanların çempionatında 5 oyundan 5 xal toplayaraq vahid liderdir. Vüqar Manafov, Fərid Mustafayev, Altay Eynullayev və Atilla Eynullayev 4 xal toplayaraq 5-9-cu yerləri bölüşdürürlər.

13 yaşlı məktəblilər arasında mübarizə aparan Kənan Qarayev liderdən yarım xal az toplayaraq 4.5 xalla 2-ci pillədədir. Eyni yaşlı qızların çempionatında Aytac Heydərova 4.5 xalla zirvənin yeganə sahibidir.

Səid Rəfili 15 yaşlı məktəblilər arasında aktivinə 3.5 xal yazaraq 5-ci yerin sahibidir. İradə Əhmədova 3.5 xalla eyni yaş qızlar arasında 3-5-ci yerləri bölüşdürür.

17 yaşlı oğlanların çempionatında Qulam Məmmədli 3 xal toplayaraq 10-cu pillədə qərarlaşıb.

Yarış isveçrə sistemi ilə 9 tudan ibarət olmaqla keçirilir. Çempionat iyulun 3-də başa çatacaq.