8 sentyabr 2012 21:00
Olimpiada-2016 Bakıda keçiriləcək!
2016-cı il Şahmat Olimpiadası Bakıda keçiriləcək. Azerisport.az xəbər verir ki, bu barədə qərar Beynəlxalq Şahmat Federasiyasının Türkiyənin İstanbul şəhərində keçirilən 83-cü konqresində qəbul olunub.
Konqresdə yalnız Azərbaycanın namizədliyinə baxılıb. Tədbirin əvvəlində Ermənistan tərəfi olimpiadanın ölkəmizdə təşkilinin müzakirə olunmasına mane olmağa çalışıb. Ermənistan Şahmat Akademiyasının direktoru Ermənistan – Azərbaycan münaqişəsinin keçirildiyi müddətdə olimpiadanın Bakıda keçirilməməsini təklif edib. Lakin Türkiyə Şahmat Federasiyasının prezidenti Ali Nihat Yazıçı öncə Bakı şəhərinin təqdimatının nümayişini, sonra isə Ermənistan tərəfinin təklifinin səsə qoyulmasının məqsədəuyğunluğunu deyib. Bakının təklifinin dəyərləndirilməsi səsvermə ilə qərara alınıb.
Geniş müzakirələrdən sonra ermənilərin bütün narazılıqlarına yerində cavab verilib və Şahmat Olimpiadasının Bakıda keçirilməsi təklifi səsə qoyulub. Əksəriyyət təklifin lehinə səs verib. Beləliklə, Azərbaycan idmanı tarixi ərzində ölkəmizin ən nüfuzlu yarışına təşkilatçılıq edəcəyi təsdiqlənib.
