5 sentyabr 2012 23:58
Azərbaycan Yunanıstanı məğlub edib, Çinlə sülh bağladı (YENİLƏNİB)
Türkiyənin İstanbul şəhərində təşkil olunan Ümumdünya Şahmat Olimpiadası davam edir. Azerisport.az xəbər verir ki, bu gün 8-ci turun oyunları keçirilib.
Azərbaycanın kişilərdən ibarət yığması səkkizinci görüşündə Çin ilə üz-üzə gəlib. Baş məşqçi Vladimir Tukmakov bu dəfə Teymur Rəcəbova, Şəhriyar Məmmədyarova, Rauf Məmmədova və Qədir Hüseynova güvənib. Teymurla Qədir rəqibləriylə sülhə razılaşıb. Şəhriyar qələbə qazansa da, Rauf rəqibinə uduzub. Nəticədə yığmamız 2:2 hesablı heç-heçəyə razılaşıb - 2:2.
Qadınlardan ibarət yığmamız isə bu tur Yunanıstan ilə qarşılaşıb. Qızlarımızdan yunanlarla Zeynəb Məmmədyarova, Gülnar Məmmədova, Türkan Məmmədyarova və Xəyalə İsgəndərova mübarizə aparıb. Zeynəb, Gülnar və Türkan rəqibləriylə sülhə razılaşıb. Xəyalənin qələbəsi isə millimizə 2,5:1,5 hesablı qalibiyyət qazandırıb.
Qeyd edək ki, hazırda kişilərdən ibarət yığmamız 12 xalla 7-ci pillədədi. Qızlarımız isə 11 xalla 19-cu yerdə gedir.
