3 avqust 2012 02:04
Üç həmyerlimiz dünya çempionatında
Afinada yeniyetmələr arasında şahmat üzrə dünya çempionatı başlayıb. Azerisport.az xəbər verir ki, yarış çərçivəsində 1992-ci il təvəllüdlü və daha kiçik şahmatçılar üçün iki turnir keçiriləcək. 20 yaşınadək olan gənclərin yarışlarında Azərbaycan şahmatçısı Ülvi Bacarani (2446), gənc qızlar arasında bu yaş dərəcəsində Xəyalə Abdulla (2217) və Səbinə İbrahimova (2091) çıxış edirlər.
Turnir İsveçrə sistemi üzrə 13 turda keçirilir. Püşkatmada yalnız Beynəlxalq Şahmat Federasiyasının (FIDE) reytinqləri nəzərə alınır. Vaxta nəzarət: ilk 40 gediş üçün 90 dəqiqə üstəgəl 1-ci gedişdən başlayaraq hər gediş üçün 30 saniyə əlavə etməklə partiyanın sonunadək 30 dəqiqə. 30-cu gedişədək heç-heçə oyun təklif etməyə icazə verilmir.
2012-ci ilin 20 yaşınadək gənclər arasında dünya çempionatının qalibinə beynəlxalq dərəcəli qrossmeyster adı verilir. O, həmçinin 2012-2014-cü illərin dünya çempionatı yarışlarının tərkib hissəsi olan 2013-cü ilin Dünya kuboku yarışlarına seçilir.
2012-ci ilin 20 yaşınadək gənc qızlar arasında dünya çempionatının qalibinə də beynəlxalq dərəcəli qrossmeyster adı və doqquz partiya üzrə bir beynəlxalq usta norması verilir. O, həmçinin 2014-cü ildə qadınların Dünya çempionatına seçilir. Hər iki dərəcədə həm oğlanlar, həm də qızlar arasında gümüş və bürünc mükafat alanlar beynəlxalq dərəcəli usta adına layiq görülürlər.
Çempionat avqustun 15-də başa çatacaq.
