31 oktyabr 2011 18:30
Azərbaycan bürünc medal qazana bilmədi
Türkiyənin Kocaeli şəhərində keçirilən ümumdünya şahmat olimpiadası başa çatıb. Azerisport.az xəbər verir ki, bu gün turnirdə həlledici - onuncu turun oyunları keçirilib.
Azərbaycan yığması son turda meydan sahiblərinin - Türkiyənin ikinci komandası ilə üz-üzə gəlib. Ötən gün qardaş ölkənin digər yığmasını darmadağın etmiş şahmatçılarımız bu dəfə daha inamlı qələbə qazanıblar – 4:0.
Yığmamızın kapitanı Cahangir Ağarəhimov bu görüşdə aşağıdakı heyətə üstünlük verib: Nicat Abasov, Ülvi Bacarani, Kənan İzzət, Şücət Orucov. Onlar bütün rəqiblərini məğlub ediblər.
Bu qələbə Azərbaycanın ümumi hesabda İrana çatmasına şərait yaradıb. Nəticədə hər iki komanda
27,5 xal toplayıb. Lakin əlavə göstəricilərə görə üçüncü yer məhz İrana qismət olub. Beləcə, yığmamızın üzvləri medal qazana bilməyiblər.
Ümumi nəticədə qaliblər bunlar olub: Rusiya – 30; Ermənistan – 28,5, İran – 27,5, Azərbaycan - 27,5.
