26 iyul 2011 13:08
Millimiz DÇ-ni qələbə və 7-ci yerdə bitirdi
Çinin Ninqbo şəhərində keçirilən şahmat üzrə kişilər arasında dünya çempionatına yekun vurulub. Azerisport.az xəbər verir ki, bu gün turnirdə sonuncu - doqquzuncu turun oyunları keçirilib.
Azərbaycan milli komandası hesabat turunu təsəlliverici qələbə ilə başa vurub. Yığmamızın üzvləri son turda Misir üzərində qələbəyə seviniblər.
Millimizin üzvlərindən Teymur Rəcəbovla Vüqar Həşimov müvafiq olaraq Ahmed Adli və Amin Bassem üzərində qələbə qazanıblar. Qədir Hüseynov rəqibi ilə xalları yarı bölməyə üstünlük veribsə, Şəhriyar Məmmədyarov rəqibinə uduzub. Lakin bu, ümumi hesabda komandamızın qələbəsinə mane olmayıb.
Qeyd edək ki, Azərbaycan millisi ikinci turda Hindistana, eləcə də Rusiyaya da eyni aqibəti yaşatmışdı. Çinlə, eləcə də İsrail və Ermənista ilə qarşılaşmalarda isə şahmatçılarımız heç-heçə etmişdilər. Macarıstan, Ukrayna və ABŞ ilə oyunlarda isə komandamız məğlubiyyətlə üzləşmişdi.
AZƏRBAYCAN – MİSİR - 2,5:1,5
Teymur Rəcəbov – Ahmed Adli – 1:0
Vüqar Həşimov – Amin Bassem - 1:0
Qədir Hüseynov – Mohammed Ezat – 0,5:0,5
Şəhriyar Məmmədyarov – Sami Şoker - 0:1
Beləliklə, DÇ iştirakçıları turniri aşağıdakı yerlərdə bitiriblər: Ermənistan – 14 xal (22,5 xüsusi xal), Çin - 13 (22,5), Ukrayna - 12 (19,5), Rusiya - 10 (21), Macarıstan - 10 (19,5), ABŞ - 10 (18,5), Azərbaycan - 9 (19), Hindistan - 7 (15,5), İsrail - 5 (13), Misir - 0 (9).
