25 iyul 2011 19:26
Millimiz Ermənistanı məğlub edə bilmədi
Çinin Ninqbo şəhərində keçirilən şahmat üzrə kişilər arasında dünya çempionatı davam edir. Azerisport.az xəbər verir ki, bu gün turnirdə səkkisinci turun oyunları keçirilib.
Azərbaycan milli komandası kifayət qədər prinsipial xarakter daşıyan hesabat turunu heç-heçə ilə başa vurub. Çünki yığmamızın üzvləri bu dəfə Ermənistan seçməsi ilə mübarizə aparırdılar.
Millimizin üzvlərindən Teymur Rəcəbovla Vüqar Həşimov müvafiq olaraq Levon Aronyan və Sergey Movsesyanla xalları yarı bölüb. Təəssüf ki, Rauf Məmmədov Vladimir Akopyanla mübarizədən məğlub ayrılıb. Əvəzində Şəhriyar Məmmədyarov Qabriel Sarkisyanla görüşdə bu yenilginin əvəzini çıxmağı bacarıb. Beləcə, bu dəfə də yığmamız heç-heçə ilə kifayətlənib.
Qeyd edək ki, buna qədər Azərbaycan millisi ilk turda Çinlə, eləcə də İsrail ilə heç-heçə etmişdi - 2:2. İkinci turda Hindistana 3:1 hesabıyla qalib gəlmiş komandamız Rusiyaya da eyni aqibəti yaşadıb. Macarıstan, Ukrayna və ABŞ ilə oyunlarda isə komandamız məğlubiyyətlə üzləşmişdi.
AZƏRBAYCAN – ERMƏNİSTAN - 2:2
Teymur Rəcəbov – Levon Aronyan – 0,5:0,5
Vüqar Həşimov – Sergey Movsesyan - 0,5:0,5
Rauf Məmmədov – Vladimir Akopyan - 0:1
Şəhriyar Məmmədyarov – Qabriel Sarkisyan - 1:0
Beləliklə, 8 turdan sonra turnir cədvəlindəki vəziyyət belədi: Ermənistan – 13 xal (20,5 xüsusi xal), Çin - 11 (20), Ukrayna - 11 (17,5), Rusiya - 10 (19,5), Macarıstan - 10 (18), ABŞ - 8 (16), AZƏRBAYCAN - 7 (16,5), Hindistan - 5 (13), İsrail - 5 (11,5), Misir - 0 (7,5).
