5 noyabr 2011 11:45
Türkiyə yığma komandası Azərbaycana gəlir
Noyabrın 6-da start götürəcək akademik, kayak və kanoe qayıqlarında avarçəkmə üzrə ənənəvi Beynəlxalq "Mingəçevir Reqatası-2011”ə 5 ölkə qatılacaq. Azerisport.az xəbər verir ki, Azərbaycan idmançılarından əlavə, Rusiya, Ukrayna, Gürcüstan və Türkiyə avarçəkənləri qələbə uğrunda mübarizə aparacaqlar.
Mingəçevirdə təşkil olunmuş əvvəlki beynəlxalq reqatalarda ilk 3 əcnəbi ölkənin təmsilçıləri çıxış edibsə, Türkiyə yığması ilk dəfə qüvvəsini sınayacaq. Bu isə Azərbaycan Milli Avarçəkmə Federasiyasının qardaş ölkənin müvafiq qurumu ilə də əlaqələrinin get-gedə genişlənməsindən xəbər verir. Digər tərəfdən, Mingəçevir şəhərində yarışın keçiriləcəyi “Kür” Olimpiya Mərkəzi bütün müasir tələblərə cavab verməsi və ilboyu məşq imkanları baxımından, digər ölkələrin də diqqətini cəlb edib. Təsadüfi deyil ki, Ukrayna millisi nəinki reqatada iştirak edəcək, hətta turnirdən sonra qalaraq, uzunmüddətli təlim-məşq toplanışı keçəcək.
Tamaşaçılar bir-birindən maraqlı yürüşlərin şahidi olacaqlar. Belə deməyə ilk növbədə, reqatada Azərbaycanın bütün məşhur avarçəkənlərinin iştirakı faktı əsas verir. 2011-ci ildə 3 kanoeçimiz –Valentin Demyanenko, Sergey Bezuqlıy və Maksim Prokopenko, eləcə də 2 akademik avarçəkənimiz – Aleksandr Aleksandrov və Nataliya Mustafayeva dünya çempionatlarında uğurla çıxış edərək, 2012-ci il London Yay Olimpiya Oyunlarına lisenziya qazanıblar. Bununla belə, onlar Beynəlxalq "Mingəçevir Reqatası-2011”də də çıxış edəcəklər.
Yarışın baş hakimi İlqar Tağıyev olacaq. Açılış mərasimi noyabrın 6-da saat 10:00-da başlanacaq. Turnir 3 gün davam edəcək.
