18 avqust 2011 17:00
Azərbaycan DÇ-nin finalında (FOTO)
Azərbaycan kanoeçiləri Sergey Bezuqlıy və Maksim Prokopenko Macarıstanın Seqed şəhərində keçirilən 2012-ci il London Yay Olimpiya Oyunlarına lisenziya xarakterli dünya çempionatına uğurla başlayıblar. Azerisport.az xəbər verir ki, 2 nəfərlik kanoe qayığı (C-2) ilə mübarizə aparan duetimiz 500 metr məsafəyə yürüşdə əsas finala vəsiqə qazanıb.
Onlar seçmə yürüşdə finişə 1 dəqiqə 42,752 saniyəyə çatıblar. Bu nəticə ilə Bezuqlıy – Prokopenko cütlüyü birinci yeri tutan Yevgeni İqnatov – İvan Ştıl duetindən 0,414 saniyə geri qalıblar. Üçüncü yeri isə çexiyalı Yaroslav Radon – Filip Dvoryak dueti tutub. Hər üç duet birbaşa finala yüksəlib.
Bu gün mübarizəyə daha bir kanoeçimiz Adnan Əliyev də qoşulub. Əliyev 1 nəfərlik qayıqla (C-1) 1000 metr məsafəyə seçmə yürüşdə 4-cü yeri tutub. Finişə 4 dəqiqə 13,940 saniyəyə çatan kanoeçimiz macarıstanlı Atilla Vayda (04:05.828), bolqarıstanlı Deyan Georgiyev (04:08.726) və çinli Şaokun Huanqdan (04:09.086) geri qalıb. Bununla belə, Əliyev ilk “7-liy”ə düşdüyündən, özündən əvəlki idmançılar və geridə qoyduğu ABŞ təmsilçisi Robert Finlayson (04:15.476), xorvatiyalı Nikiça Lyubek (04:18.878) və vyetnamlı Van Lonq Tranla (04:23.582) birgə yarımfinala yüksəlib.
