29 iyun 2011 16:04
Yığmamızın AÇ üçün heyəti açıqlandı
İyunun 30-da Xorvatiyanın paytaxtı Zaqrebdə kayak və kanoe üzrə yeniyetmələr və 23 yaşadək kayak və kanoeçilər arasında Avropa çempionatı start götürəcək. Azerisport.az xəbər verir ki, 38 ölkənin qatılacağı nüfuzlu yarışda Azərbaycanı 11 idmançı təmsil edəcək.
Onlardan 8-i yeniyetmələr arasında mübarizə aparacaq. Kayakçılarımızdan 2 nəfərlik qayıqla (K-2) Yasin Əhmədov – Amil Hüseynli dueti 1000 metr, Rüfət Vəlizadə - Tamerlan Mustafayev dueti isə 200 metr və 500 metr məsafələrə yürüş edəcəklər. Yürüşlərin 18 yaşadək idmançılar arasında keçirilməsinə baxmayaraq, Əhmədovla Hüseynlinin cəmi 15 yaşı var. İstedadlı kayakçılarımız martda keçirilmiş Beynəlxalq Prezident Kuboku reqatasında daha yaxşı nəticə göstərdikləri üçün yığmamızın heyətinə cəlb olunublar. Vəlizadə - Mustafayev dueti isə ötən ay böyüklər arasında keçirilmiş Dünya Kubokunun I və III mərhələ yarışlarında yarımfinaladək irəliləməyi bacarıb.
Yeniyetmə kanoeçilərimizə gəldikdə, 2010-cu il Sinqapur Yay Olimpiya Oyunlarında ölkəmizi təmsil etmiş Radoslav Kutsev Avropa çempionatında 1 nəfərlik qayıqla (C-1) 1000 metr, Aleksey Kuçer isə 200 metr və 500 metr məsafələrə yürüş edəcəklər. 2 nəfərlik qayıqla (C-2) mübarizə aparacaq Aleksey Kupin – İqor Delistianov dueti 500 metr və 1000 metr məsafələrə yürüşlərdə qüvvələrini sınayacaqlar.
23 yaşadək kayak və kanoeçilərin yarışında isə ölkəmizi 3 idmançı təmsil edəcək. 1 nəfərlik kanoe qayığı (C-1) ilə ötənilki Avropa birinciliyinin gümüş mükafatçısı Andrey Kraytor 200 metr və 500 metr, böyüklər arasında son Avropa çempionatının yarımfinalçısı Boqdan Kurudz isə 1000 metr məsafəyə yürüşlərə qatılacaq. Kayakçıların yarışında Mirnazim Cavadov 1 nəfərlik qayıqla (C-1) 200 metr və 500 metr məsafələri qət edəcək.
Kayak və kanoeçilərimiz Polşada uzunmüddətli təlim-məşq toplantısı və ayrı-ayrı ölkələrdə bir neçə turnirdə iştirak etdikdən sonra Zaqrebə yollanıblar. Onlar qitə birinciliyində milli komandamızın baş məşqçisi Aleksandr Kolıbelnikov və məşqçi Anatoli Dudnikin rəhbərliyi altında mübarizə aparacaqlar. Ümumiyyətlə, kayak və kanoeçilərimiz üst-üstə 13 məsafəyə yürüş edəcəklər ki, bu da onların maksimum 13 medala iddia edəcəkləri anlamına gəlir.
