26 iyun 2011 15:14
Azərbaycan Avropa çempionatının finalında!
İyunun 25-də Polşanın Kruşvitsa şəhərində akademik avarçəkmə üzrə yeniyetmə oğlan və qızlar arasında 1-ci Avropa çempionatı start götürüb. Azerisport.az xəbər verir ki, 18 yaşadək avarçəkənlərin qatıldıqları yarışda Azərbaycanı Boris Yotov təmsil edir. 16 yaşlı idmançımız 1 nəfərlik qayıqla (JM1X) 2000 metr məsafəyə yürüşdə qüvvəsini sınayır.
Avropa çempionatının ilk günündə Yotov seçmə mərhələ yürüşünə qatılıb. O, Latviya, Çexiya, Litva, Slovakiya və Estoniya avarçəkənləri ilə mübarizədə birinci yeri tutub. Təmsilçimiz 2000 metr məsafəni 7 dəqiqə 42,45 saniyəyə qət edib. O, ən yaxın rəqibini 4,83 saniyə qabaqlayıb. Bu nəticə ilə Yotov birbaşa əsas finala vəsiqə qazanıb.
Texniki nəticələr
Yeniyetmələr arasında Avropa çempionatı
Məsafə: 2000 metr
1 nəfərlik qayıq (JM1X)
Seçmə mərhələ
1. Boris Yotov (AZƏRBAYCAN) – 07:42,45
2. Gints Zunde (Latviya) – 07:47,28
3. Mixal Plosek (Çexiya) – 07:50.32
4. Aurimas Adomaviçyus (Litva) – 07:57.45
5. Roxard Vanko (Slovakiya) – 08:07.47
6. Mixel Pari (Estoniya) – 08:08.85
Əsas final yürüşü bu gün keçiriləcək. Bakı vaxtı ilə saat 17:58-də startı veriləcək yürüşdə Boris Yotovun rəqibləri Andrey Mixaylov (Ukrayna), Rafal Zaykovski (Polşa), Boris Qardijan (Xorvatiya), Yeqor Matsukov (Belarus) və Gints Zunde (Latviya) olacaq.
Qeyd edək ki, Boris Yotov Azərbaycanın ən istedadlı akademik avarçəkənlərindəndir. Cəmi 16 yaşının olmasına baxmayaraq, o, 18 yaşlılar arasında uğurlu nəticələri ilə diqqət çəkir. Yotov Polşaya milli komandamızın məşqçisi Yuliana Stoyevanın rəhbərliyi altında yollanıb. Avarçəkənimiz çempionat öncəsi Almaniyanın Münhen şəhərində “Internationale DRV-Junioren-Regatta” turnirində qızıl, Rusiyanın paytaxtı Moskvada isə Beynəlxalq Dostluq reqatasında gümüş medala sahib olub. O, eyni zamanda Almaniyada böyüklərdən ibarət yığmamızla birgə təlim-məşq toplantısında iştirak edib.
