18 iyun 2011 19:22
Yığmamızın iki üzvü DÇ-nin finalında
Almaniyanın Hamburq şəhərində təşkil olunan akademik avarçəkmə üzrə kişi və qadınlar arasında Dünya Kubokunun II mərhələsində bu gün yarımfinal yürüşləri keçirilib. Azerisport.az xəbər verir ki, Azərbaycanı təmsil edən 4 avarçəkəndən 2-si əsas finala yüksəlib.
Bunlar kişilərin 1 nəfərlik yüngül çəkili qayıqla (LM1X) yürüşünə qatılan Cavid Əfəndiyev və qadınlar arasında 1 nəfərlik qayıqla (W1X) yarışan Nataliya Mustafayevadır. Əfəndiyev yarımfinalda 2000 metr məsafəni 7 dəqiqə 25,07 saniyəyə qət edərək, 3-cü yeri tutub. Avarçəkənimiz Yeni Zelandiya və ABŞ təmsilçilərindən geri qalsa da, Honq Konq, Braziliya və Özbəkistandan olan rəqiblərini qabaqlaya bilib. Bu nəticə onun ilk 2 pillənin sahibləri ilə birgə əsas finala yüksəlməsi üçün yetərli olub. Həlledici yürüş bu gün Bakı vaxtı ilə saat 20:03-də olacaq.
Mustafayeva da eyni məsafəni 3-cü pillədə başa vurub. O, finişə 7 dəqiqə 35,07 saniyəyə çatıb. Çin və Yeni Zelandiya təmsilçilərindən geri qalan qadın idmançımız Rusiya, Estoniyadan olan rəqiblərini və Azərbaycanın digər təmsilçisi İskra Angelovanı geridə qoyub. Mustafayeva ilk 2 pillənin sahibləri ilə birgə əsas finala, 8 dəqiqə 14,46 saniyə nəticə göstərmiş Angelova isə 7 – 12-ci yerlər uğrunda mübarizəyə imkan verən B finalına çıxıb. B finalı bu gün saat 19:18-də, əsas final sabah keçiriləcək.
Nəhayət, kişilər arasında 1 nəfərlik qayıqla (M1X) çıxış edən Aleksandr Aleksandrov yarımfinalda 4-cü yeri tutub. 7 dəqiqə 10,43 saniyə nəticə ilə Yeni Zelandiya, İsveç və ABŞ-dan olan rəqiblərindən geri qalan Aleksandrov Braziliya və İsveçrə təmsilçilərini üstələyib. Avarçəkənimiz bu nəticə ilə B finalına çıxıb. Həmin yürüş bu gün saat 19:24-də baş tutacaq.
