30 may 2011 12:15
Dünya kubokunda 1 gümüş, 2 bürünc
Almaniyanın Duysburq şəhərində kayak və kanoe üzrə Dünya Kubokunun 3-cü mərhələsinə yekun vurulub. Azerisport.az xəbər verir ki, yarışda çıxış edən Azərbaycan yığması iki gümüş, bir bürünc medal qazanıb.
Kanoeçilərin mübarizəsində 1 nəfərlik qayıqla (C-1) mübarizə aparan Valentin Demyanenko 1 gümüş, 1 bürünc, 2 nəfərlik qayıqla (C-2) yarışan Sergey Bezuqlıy – Maksim Prokopenko dueti isə gümüş medala sahib olub.
Əvvəlcə Valentin Demyanenko 500 metr və 200 metr, Andrey Kraytor isə 200 metr məsafəyə 1 nəfərlik qayıqla yürüşdə əsas finala (Final A) vəsiqə qazanıb. Demyanenko 500 metr məsafəyə yürüşdə seçmə mərhələni 1 dəqiqə 55,456 saniyəyə 1-ci pillədə qət edib. C-1 kateqoriyalı qayıqla eyni məsafəyə yürüş edən Andrey Kraytor isə 2 dəqiqə 0,609 saniyə nəticə ilə 2-ci yeri tutub. Demyanenko birbaşa mayın 29-da keçirilmiş əsas finala yüksəlib. Həlledici yürüşdə o, 1 dəqiqə 50,50 saniyə nəticə ilə 3-cü yeri tutub. Kraytor isə yarımfinalda 2 dəqiqə 4,668 saniyə nəticə ilə 4-cü yeri tutub və mayın 29-da saat 16:40-da 10 – 18-ci yerlər uğrunda mübarizəyə imkan verən B finalında mübarizə aparıb. O, 1 dəqiqə 52,394 saniyə nəticə ilə 10-cu olub.
Valentin Demyanenko ilə Andrey Kraytor mayın 28-də 200 metr məsafəyə yürüşə də qatılıblar. Seçmə mərhələdə Demyanenko 40,338 saniyə nəticə ilə birinci, Kraytor isə 42,571 saniyə nəticə ilə 2-ci yeri tutub. Onlar yarımfinala yüksəliblər. Növbəti mərhələdə Demyanenko 40,165 saniyə nəticə ilə 1-ci, Kraytor isə 41,165 saniyə nəticə ilə 3-cü yeri tutub. Onların hər ikisi əsas finala vəsiqə qazanıb. Həlledici mərhələ yürüşündə Demyanenko finişə 40,192 saniyəyə çataraq gümüş medala sahib çıxıb. Kraytor isə 40,964 saniyə nəticə ilə 8-ci yeri tutub.
Sergey Bezuqlıy – Maksim Prokopenko dueti isə 1000 metr məsafəyə yürüşdə seçmə mərhələni 3 dəqiqə 57,985 saniyə nəticə ilə 5-ci pillədə başa vurub. Bu nəticə ilə Bezuqlıy – Prokopenko cütlüyü növbəti mərhələyə çıxıb. Yarımfinalda kanoeçi duetimiz 3 dəqiqə 39,603 saniyə nəticə ilə 1-ci yeri tutub. Beləliklə, Bezuqlıy – Prokopenko dueti əsas finala yüksəlib. Həlledici mərhələdə kanoeçi cütlüyümüz 3 dəqiqə 34,476 saniyə nəticə ilə ikinci olub. Yalnız rusiyaılı duetdən 0,486 saniyə geri qalan Bezuqlıy – Prokopenko dueti ölkəmizə daha bir medalı qazandırıb.
Bu cütlük daha 2 məsafəyə yürüşdə finala vəsiqə əldə edib. 500 metr məsafəyə seçmə mərhələ yürüşündə 1 dəqiqə 52,184 saniyə nəticə göstərən Bezuqlıy – Prokopenko dueti 2-ci yeri tutub və birbaşa əsas finala çıxıb. Bu məsafəyə həlledici yürüş mayın 29-da olub. Onlar finalda 1 dəqiqə 39,440 saniyə nəticə ilə 4-cü yeri tutublar. 200 metr məsafəyə seçmə yürüşdə Bezuqlıy – Prokopenko dueti 40,338 saniyə nəticə ilə birinci yeri tutub. Bununla da azərbaycanlı cütlük birbaşa əsas finala yüksəlib. Həlledici mərhələ yürüşündə onlar 38,246 saniyə nəticə ilə 6-cı yeri tutublar.
1000 metr məsafəyə 1 nəfərlik qayıqla yürüş edən daha 2 kanoeçimiz – Adnan Əliyev və Boqdan Kurudz mükafatçılar sırasına düşə bilməyib. Əliyev seçmə mərhələdə 4 dəqiqə 17,639 saniyə nəticə ilə 5-ci, Kurudz isə 4 dəqiqə 13,202 saniyə nəticə ilə 7-ci yeri tutub. Yarımfinalda isə Kurudz daha yaxşı nəticə göstərib. O, 4 dəqiqə 12,353 saniyə nəticə ilə 6-cı olduğu halda, Əliyev 4 dəqiqə 32,648 saniyə göstərici ilə 9-cu yeri tutub. Onlardan Kurudz mayın 28-də B finalında yarışıb. O, 4 dəqiqə 3,575 saniyə nəticə ilə ümumi hesabda 16-cı olub. Əliyev isə çıxışlarını başa vurub.
Kayakçılarımızdan Mirnazim Cavadov seçmə mərhələyə uğurla start götürüb. Cavadov 1 nəfərlik qayıqla (K-1) 500 metr məsafəyə yürüşdə 1 dəqiqə 49,476 saniyə nəticə ilə 1-ci yeri tutub. Yarımfinalda isə o, 1 dəqiqə 52,145 saniyə nəticə ilə 5-ci yeri tutub və mayın 29-da B finalında iştirak hüququna yiyələnib. Cavadov bu dəfə 1 dəqiqə 43,083 saniyə göstərici ilə ümumi nəticədə 15-ci olub.
Rüfət Vəlizadə - Tamerlan Mustafayev dueti isə 2 nəfərlik qayıqla (K-2) seçmə mərhələni 1 dəqiqə 38,242 saniyəyə dəf edərək, 4-cü olub. Yarımfinalda 1 dəqiqə 42,339 saniyə nəticə göstərən duet yenə 4-cü olub. Onlar da mayın 29-da B finalına qatılıblar. Bu dəfə Vəlizadə - Mustafayev dueti 01 dəqiqə 33,285 saniyə nəticə ilə 11-ci olub.
Həm Mirnazim Cavadov, həm də Rüfət Vəlizadə - Tamerlan Mustafayev dueti mayın 28-də 200 metr məsafəyə yürüşlərə də qatılıblar. Cavadov seçmə mərhələdə 38,915 saniyə nəticə ilə 6-cı yeri tutub. Vəlizadə - Mustafayev dueti isə 35,925 saniyə nəticə ilə 8-ci olub. Yarımfinalda Cavadov 40,138 saniyə nəticə ilə 9-cu yeri tutub. Vəlizadə - Mustafayev dueti isə 36,142 saniyə nəticə ilə 7-ci olub. Onların hər ikisi mübarizəni dayandırıblar.
Qeyd edək ki, kayak və kanoeçilərimiz daha öncə Polşanın Poznan şəhərində keçirilmiş Dünya Kubokunun I mərhələsində mübarizə aparıblar. Həmin yarışda Sergey Bezuqlıy – Maksim Prokopenko dueti 2 qızıl, 1 gümüş medal qazanıb.
