28 may 2011 13:34
Azərbaycan üçün 3 final
Almaniyanın Duysburq şəhərində keçirilən kayak və kanoe üzrə Dünya Kubokunun 3-cü mərhələsində Azərbaycan yığması uğurla start götürüb. Azerisport.az xəbər verir ki, kanoeçilərin mübarizəsində 2 nəfərlik qayıqla (C-2) yarışan Sergey Bezuqlıy – Maksim Prokopenko dueti 1000 metr və 500 metr, 1 nəfərlik qayıqla (C-1) çıxış edən Valentin Demyanenko isə 500 metr məsafəyə yürüşdə əsas finala (Final A) vəsiqə qazanıblar.
Bezuqlıy – Prokopenko dueti 1000 metrlik məsafəyə yürüşdə seçmə mərhələni 3 dəqiqə 57,985 saniyə nəticə ilə 5-ci pillədə başa vurub. Bu nəticə ilə Bezuqlıy – Prokopenko cütlüyü növbəti mərhələyə çıxıb. Yarımfinalda kanoeçi duetimiz 3 dəqiqə 39,603 saniyə nəticə ilə 1-ci yeri tutub. Beləliklə, Bezuqlıy – Prokopenko dueti əsas finala yüksəlib. Həlledici mərhələ yürüşü mayın 28-də Bakı vaxtı ilə saat 14:42-də olacaq. Bu cütlük 500 metr məsafəyə yürüşdə də uğurla çıxış edib. Seçmə mərhələ yürüşündə 1 dəqiqə 52,184 saniyə nəticə göstərən Bezuqlıy – Prokopenko dueti birbaşa əsas finala çıxıb. Bu məsafəyə həlledici yürüş isə mayın 29-da saat 17:29-da olacaq.
Valentin Demyanenko 500 metr məsafəyə yürüşdə seçmə mərhələni 1 dəqiqə 55,456 saniyəyə 1-ci pillədə qət edib. C-1 kateqoriyalı qayıqla eyni məsafəyə yürüş edən Andrey Kraytor isə 2 dəqiqə 0,609 saniyə nəticə ilə 2-ci yeri tutub. Demyanenko birbaşa mayın 29-da saat 17:12-də keçiriləcək əsas finala yüksəlib. Kraytor isə yarımfinalda 2 dəqiqə 4,668 saniyə nəticə ilə 4-cü yeri tutub və 10 – 18-ci yerlər uğrunda mübarizəyə imkan verən B finalına çıxıb. Həm Bezuqlıy – Prokopenko dueti, həm də Demyanenko ilə Kraytor mayın 28-də 200 metr məsafəyə yürüşə də qatılacaqlar.
Kayakçılarımızdan Mirnazim Cavadov seçmə mərhələyə uğurla start götürüb. Cavadov 1 nəfərlik qayıqla (K-1) 500 metr məsafəyə yürüşdə 1 dəqiqə 49,476 saniyə nəticə ilə 1-ci yeri tutub. Yarımfinalda isə o, 1 dəqiqə 52,145 saniyə nəticə ilə 5-ci yeri tutub və mayın 29-da keçiriləcək B finalına çıxıb. Rüfət Vəlizadə - Tamerlan Mustafayev dueti isə 2 nəfərlik qayıqla (K-2) seçmə mərhələni 1 dəqiqə 38,242 saniyəyə dəf edərək, 4-cü olub. Yarımfinalda 1 dəqiqə 42,339 saniyə nəticə göstərən duet yenə 4-cü olub. Onlar da mayın 29-da keçiriləcək B finalına çıxıblar. Həm Cavadov, həm də Vəlizadə - Mustafayev dueti mayın 28-də 200 metr məsafəyə yürüşlərə də qatılacaqlar.
Qeyd edək ki, 1000 metr məsafəyə 1 nəfərlik qayıqla yürüş edən daha 2 kanoeçimiz – Adnan Əliyev və Boqdan Kurudz isə mükafatçılar sırasına düşə bilməyib. Əliyev seçmə mərhələdə 4 dəqiqə 17,639 saniyə nəticə ilə 5-ci, Kurudz isə 4 dəqiqə 13,202 saniyə nəticə ilə 7-ci yeri tutub. Yarımfinalda isə Kurudz daha yaxşı nəticə göstərib. O, 4 dəqiqə 12,353 saniyə nəticə ilə 6-cı olduğu halda, Əliyev 4 dəqiqə 32,648 saniyə göstərici ilə 9-cu yeri tutub. Onlardan Kurudz mayın 28-də B finalında yarışacaq. Əliyev isə çıxışlarını başa vurub.
