15 avqust 2012 19:08
Yeni reytinq cədvəli açıqlandı, Azərbaycan gerilədi
Beynəlxalq Voleybol Federasiyası (FİVB) XXX London Yay Olimpiya Oyunlarının yekununa əsasən yeni reytinq cədvəlini açıqlayıb. Azerisport.az xəbər verir ki, siyahı Azərbaycan yığmaları üçün uğurlu alınmayıb.
Belə ki, Faiq Qarayevin rəhbərlik etdiyi qadınlardan ibarət millimiz bir pillə geriləyərək 14,25 xalla Rumıniya ilə birgə 37-38-ci yerləri bölüşürlər. Bu siyahıya Olimpiya Oyunlarının finalçıları başçılıq edir. Yarışın gümüş mükafatçısı ABŞ (312,50) 1-ci, çempionu Braziliya (292,50) 2-ci pillədə qərarlaşıblar. İlk üçlüyü Londonda bürünc almaqla 2 pillə irəliləyən Yaponiya (246,00) tamamlayır.
Kişilərdən ibarət Azərbaycan yığması 4,75 xalla Sent Kitts, Dominika adaları, Sent Vinset və Qrenadin, Anguilla adaları, Qrenada, Macarıstan və Beliz yığmaları ilə 93-100-cü yerləri bölüşür. Bu siyahıya da London Olimpiadasının finalında Rusiyaya uduzan Braziliya (300,00) başçılıq edir. Çempion olan Rusiya (276,50) ikinci, bürünc mükafatı qazanan İtaliya (235,50) isə üçüncü yerdədi.
