28 mart 2012 21:22
Azərbaycan finalında ilk qələbəni Lokomotiv qazandı (YENİLƏNİB)
Qadın voleybolçular arasında Çellenc kubokunun finalında ilk oyun keçirilib. Azerisport.az xəbər verir ki, həlledici görüşdə iki Azərbaycan klubu - “Bakı” və “Lokomotiv” üz-üzə gəlib.
Qeyd edək ki, istənilən halda kubok Azərbaycanda qalacaq. Matcda hər 2 komandanın qalib gəlmək şansı var. Düzdü, “Bakı” bu mövsüm “dəmiryolçular”dan daha güclü olub. Onlar Super Liqanın təsnifat mərhələsinin hər 2 matçında “Lokomotiv”i üstələmişdilər (3:0, 3:1). Lakin avrokubokun debütantı olan “Bakı” ilə “dəmiryolçular”ın çempionluq şansı bərabər qiymətləndirilir. Çünki Draqutin Baltiçin komandasının beynəlxalq oyun təcrübəsi yüksəkdi. Bu azmış kimi, klub son zamanlar heyətini daha gücləndirib.
Elə bu görüşdə də sözügedən məqam öz sözünü dedi. Nəticədə, "dəmiryolçular" çətinliklə də olsa, qələbə qazanmağı bacardılar. Amma təbii ki, hər şeyə növbəti final matçında aydınlıq gələcək.
Maraq üçün xatırladaq ki, bu turnirdə ötən il də iki Azərbaycan klubu finala vəsiqə qazanmışdı. O zaman da finalçılardan biri məhz “Lokomotiv” idi. Amma bu klubumuzla dueldən daha güclü çıxan “Azərreyl” turnirin baş mükafatına sahiblənmişdi.
Çellenc kuboku
Final (ilk oyun)
28 mart
28 mart
Bakı – Lokomotiv - 2:3 (23:25, 23:25, 25:17, 25:15, 13:15)
Hakimlər: Kari Partiaymen (Finlandiya), Deniz Demir (Türkiyə)
Heydər Əliyev adına İdman-Konsert Kompleksi.
