18 mart 2012 21:23
Bakı da finala çıxdı (YENİLƏNİB)
Azərbaycanın qadın voleybolçulardan ibarət “Bakı” klubu bu gün Çellenc kubokunda yarımfinal mərhələsinin cavab oyununa çıxıb. Azerisport.az xəbər verir ki, təmsilçimiz bu mərhələdə Almaniyanın “Zulh” komandası ilə mübarizə aparırdı.
Bu komandalar arasındakı ilk qarşılaşma rəqib meydanında keçirilmişdi. Təmsilçimiz həmin oyundan qalib ayrılmaqla finala çıxmaq yolunda önəmli addım atmışdı. Bu uğurun davamını doğma meydanda da gətirməklə, həlledici oyuna vəsiqəni rəsmiləşdirmək lazım idi. Komandamız bu vəzifənin öhdəsindən layiqincə gəlib və finala adlayıb.
Xatırladaq ki, “Bakı” bu mövsüm öncə Fransanın “Evre” klubu üzərində qazandığı zəfər sayəsində növbəti mərhələyə yüksəlmişdi. Ardından isə Kipr “Apollon”u və Xorvatiyanın “Rijeka” komandası “Bakı”nın qarşısında duruş gətirə bilməmişdi. 1/4 final mərhələsində də Rusiyanın “Omiçka” komandası bakılılarla bacarmamışdı.
Onu da əlavə edək ki, digər yarımfinal cütündə də Azərbaycan klubu (Lokomotiv) finala çıxmaq üçün mübarizə aparırdı və buna nail olub. Beləliklə, turnirin finalında iki Azərbaycan klubu mübarizə aparacaq.
Çellenc kuboku
1/2 final (cavab oyunu)
18 mart
Bakı - Zulh - 3:0 (25:12, 25:22, 25:17)
İlk oyun
Zulh – Bakı - 0:3 (24:26, 19:25, 17:25)
