10 fevral 2012 14:06
Azərbaycan klubu üçün Çexiya təmsilçisi
Qadın voleybolçular arasında Çellenc kubokunun 1/8 final mərhələsində Serbiyanın “Vizura” klubunu mübarizədən kənarlaşdıraraq mərhələ adlayan “Lokomotiv”in növbəti rəqibi müəyyənləşib. Azerisport.az xəbər verir ki, təmsilçimiz 1/4 finalda Çexiya klubu ilə qarşılaşacaq.
Belə ki, “dəmiryolçular” 1/4 finalda “Kralovo” ilə görüşəcək. Çexiya təmsilçisi 1/8 final mərhələsində Ukraynanın “Ximik” klubu ilə mübarizə aparırdı. Bu komanda doğma meydanda 3:2 hesabıyla qələbə qazansa da, səfərdə 1:3 yenilib. Lakin qızıl setdə qazanılan qələbə (15:10) 1/4 finala məhz çexləri çıxarıb.
Maraq üçün xatırladaq ki, Azərbaycan təmsilçisi də “Vizura”nı evdə 3:1, səfərdə isə 3:0 hesabıyla yenməklə mərhələ adlamışdı. Ondan öncə isə komandamız Macarıstan “Vaşaş”ı və Xorvatiya “Split”ini mübarizədən kənarlaşdırmışdı.
