4 fevral 2012 01:28
Klublarımızın potensial rəqibləri müəyyənləşdi
Qadın voleybolçular arasında Çellenc Kuboku yarışlarında Azərbaycanın “Bakı” və “Lokomotiv” klublarının potensial rəqibləri oyunlarını keçiriblər. Azerisport.az xəbər verir ki, turnirin 1/4 finalında Azərbaycan klublarının qarşılaşa biləcəyi “Veert” (Belçika) – “Omiçka” (Rusiya) və “Brno” (Çexiya) – “Ximik” (Ukrayna) matçlarında fərqli nəticələr qeydə alınıb.
“Bakı” mərhələ adlayacağı halda, “Veert” (Belçika) – “Omiçka” (Rusiya) cütünün qalibi ilə qarşılaşacaq ki, bu cütün taleyi də ilk görüşdə həll olunub. Rusiyalı voleybolçular səfərdə 3:0 (25:23, 25:22, 28:26) hesabı ilə qələbə qazanıblar və bu üstünlüyü evdə əldən verəcəkləri inandırıcı görünmür.
“Lokomotiv” 1/4 finala yüksələrsə, çox güman “Ximik”lə qarşılaşacaq. Çünki “Brno” ukraynalılara evdə çətinliklə qalib gəlib – 3:2 (18:25, 27:25, 25:17, 21:25, 15:9).
Qeyd edək ki, Çellenc kuboku yarışlarının ötən mövsümündə “Omiçka” “Lokomotiv”ə, “Ximik” isə “Azərreyl”ə uduzmuşdu.
