Rabitə daha bir mükafat qazandı

31 yanvar 2011-ci il tarixində UĞUR-2011 mükafatlandırma mərasimi keçirilib. Azerisport.az xəbər verir ki, olduqca yüksək səviyyədə təşkil olunan turnirdə 2011-ci ildə müxtəlif idman növlərində böyük uğurlara imza atmış laureatlar öz mükafatlarına qovuşub.

 

Milli Olimpiya Komitəsi və Gənclər və İdman Nazirliyinin "İlin Komandası" kimi təltif etdiyi "Rabitə" bu tədbirdə də eyni mükafata layiq görülüb. İlk dəfə tarixində Avropa Çempionlar liqasında iştirak etmiş və elə debüt ilindəcə bu turnirin Finalına yüksələrək gümüş medallara sahib olan "Rabitə" voleybol komandası elə həmin ildəcə Qətərdə təşkil olunan Klublararası Dünya Çempionatında qızıl medallara yiyələnməklə adını Azərbaycan İdmanına qızıl hərflərlə yazdırdı.

 İlin son turniri - kiçik Dünya Çempionatı kimi dəyərləndirilən ənənəvi Top Volley turnirində də rəqiblərini bir nəfəsə məğlub edən Rabitə turnirin baş mükafatına sahib olmaqla bərabər həm də uğurlarının təsadüfi olmadığını bir daha sübut etdi.

 

Bütün bu uğurlara əvəzsiz töfhə vermiş klub prezidenti Cəlil Cəfərova UĞUR-2011 mükafatı çərçivəsində "İlin Komandası" mükafatı təqdim edildi. Klubun prezidenti isə öz növbəsində bu mükafatdan qürur duyduğunu və komandamızın gələcəkdə də zirvədə qalması üçün əlindən gələni edəcəyini söylədi.