26 yanvar 2012 18:11
Klublarımızın avrokubok oyunlarının təqvimi açıqlandı
Azərbaycanın voleybol klublarının avrokuboklardakı oyunlarının təqvimi müəyyənləşib. Azerisport.az xəbər verir ki, bu barədə Azərbaycan Voleybol Federasiyası rəsmi məlumat yayıb.
Məlumatda bildirilir ki, Çempionlar Liqasının 1/8 final mərhələsində mübarizə aparan “Azərreyl” voleybol klubu 1 fevral 2012-ci ildə səfərdə İsveçrənin “Volero Bergamo” komandası ilə görüşəcək. Görüş Bakı vaxtı ilə saat 23:15 də başlayacaq. Cavab görüşü isə 8 fevralda 18:00-da Bakı İdman Sarayında keçiriləcək.
Çempionlar Liqasının daha bir iştirakçısı olan “Rabitə” klubu da mübarizəni davam etdirir. Komandamız 1 fevral 2012-ci il tarixində səfərdə Polşanın “Atom Trefl Sopot” komandasına qarşı saat 23:30 da oynayacaq. Cavab görüşü isə 9 fevralda paytaxtımızda keçiriləcək.
“Lokomotiv” və “Bakı” klubları da “Çağırış Kuboku” uğrunda mübarizəni davam etdirir. “Lokomotiv” klubu 1 fevral 2012-ci il tarixində paytaxtımızda Serbiyanın “Vizura Beograd” komandasını qəbul edəcək. Görüş 18:00-da Bakı İdman Sarayında keçiriləcək. Cavab oyunu isə səfərdə 8 fevral 21:00 keçirəcək.
“Bakı” klubu isə 1/8 final mərhələsində Xorvatiyanın “Zok Rijeka” komandası ilə qarşılaşacaq. İlk görüşünü komandamız paytaxtımızda 2 fevral 19:30 da keçirəcək. Cavab görüşü isə 8 fevral tarixində səfərdə baş tutacaq.
