19 yanvar 2012 20:17
İqtisadçı tay-brekdə uduzdu (YENİLƏNİB)
Bu gün Azərbaycanın qadın voleybolçulardan ibarət “İqtisadçı” klubu CEV (Avropa Voleybol Konfederasiyası) kuboku yarışlarının 2011/2012-ci il mövsümündə növbəti oyununu keçirib. Azerisport.az xəbər verir ki, komandamız 1/8 final mərhələsi çərçivəsində cavab oyununa çıxıb.
Təmsilçimizin bu mərhələdəki rəqibi isə İtaliyanın “Yamamay” klubuydu. 1/16 finalda Rumıniya “Dinamo Romprest”indən güclü olan “İqtisadçı” indi də eyni aqibəti italyanlara yaşatmaq istəyirdi. Bu komandanın əvvəlki mərhələdə Fransanın “Cannet” klubunu turnirdən uzaqlaşdırdığını da qeyd edək.
Lakin “İqtisadçı”nın işi heç də asan deyildi. Məsələ burasındadı ki, komandamız İtaliyada baş tutan ilk görüşdə darmadağınla üzləşmişdi. Bu üzdən də təmsilçimizin doğma meydandakı görüşdə dönüş yaratmasına ümid az idi. Gözlənildiyi kimi, italyanlar komandamıza şans yeri qoymayıblar və ümumi hesabda qələbə qazanmağı bacarıblar. Beləcə, "İqtisadçı" mübarizəni dayandırmalı olub.
CEV kuboku
1/8 final (cavab oyunu)
19 yanvar
İqtisadçı - Yamamay - 2:3 (21:25, 25:20, 19:25, 25:18, 13:15)
