31 oktyabr 2011 17:36
Azərbaycan Belarus, Finlandiya və Avstriyaya rəqib oldu
Voleybol üzrə gənclərdən və böyüklərdən ibarət milli komandalar arasında növbəti Avropa çempionatlarının püşkatma mərasimi keçirilib. Azerisport.az xəbər verir ki, Avropa Voleybol Konfederasiyasının Lüksemburqda yerləşən mənzil-qərargahında baş tutan mərasimdə Azərbaycanın da rəqibləri müəyyənləşib.
2012-ci ildə keçiriləcək gənclər arasında Avropa çempionatında voleybolçu qızlarımız həlledici mərhələyə vəsiqə uğrunda mübarizəyə ikinci təsnifat mərhələsindən başlayacaq. Voleybolçularımız Sloveniyanın ev sahibliyi edəcəyi seçmə mərhələnin B qrupunda çıxış edəcək. 2012-ci ilin 10-15 aprelində keçiriləcək seçmə mərhələdə yığmamız Ukrayna, Belçika, İspaniya, Xorvatiya, Sloveniya və birinci mərhələdə qarşılaşacaq Çernoqoriya, İsveç və Estoniya yığmalarının ən güclüsü ilə qarşılaşacaq.
Faiq Qarayevin başçılıq etdiyi əsas millimiz də mübarizəyə ikinci təsnifat mərhələdən başlayacaq. Qızlarımız AÇ-2013-ün final mərhələsinə vəsiqə uğrunda C qrupunda yarışacaq və Belarus, Finlandiya, Avstriya yığmaları ilə mübarizə aparacaq. Yığmamızın yer aldığı qrupun ilk mərhələsinin oyunları gələn ilin 6-9 sentyabrında Finlandiyada, ikinci dövrəsi həmin ayın 13-16-da Bakıda keçiriləcək.
