16 oktyabr 2011 00:56
Rabitə Bakıya döndü
Qətərin paytaxtı Dohada keçirilən voleybolçu qadınlar arasında klublararası dünya çempionatının qalibi olmuş Bakının “Rabitə” komandasının üzvləri oktyabrın 15-də vətənə dönüblər. Azerisport.az xəbər verir ki, Heydər Əliyev Beynəlxalq Aeroportunda idmançıların təntənəli qarşılanması mərasimi olub.
Çoxsaylı azarkeşlər, qaliblərin doğmaları və yaxınları onları gül-çiçək dəstələri və musiqi ilə qarşılayıblar. Klubun direktoru Cəlil Cəfərov deyib ki, dünya çempionatında qazanılan birincilik böyük nailiyyətdi. Bu nailiyyət Azərbaycan Prezidenti İlham Əliyevin idmana göstərdiyi diqqət və qayğının nəticəsidi.
Komandanın baş məşqçisi Zoran Qayiç Azərbaycan voleybolçularının qələbəsini tarixi hadisə adlandırıb, kollektivin bu qalibiyyətə layiq olduğunu və uğurların davamlı olacağını diqqətə çatdırıb.
Xatırladaq ki, “Rabitə” mundialın final oyununadək Tailandın “Çanq”, Braziliyanın “Osasco” və Dominikanın “Mirador” komandalarına qalib gəlmiş və həlledici qarşılaşmada Türkiyənin “Vakıfbank” kollektivi üzərində inamlı qələbə qazanaraq ilk dəfə dünya çempionu adını qazanmışdı.
