Millimiz Hollandiya ilə bacarmdı (YENİLƏNİB)
Bu gün voleybolçu qadınlar arasında Avropa çempionatının pley-off mərhələsinin oyunlarına start verilib. Azerisport.az xəbər verir ki, bu mərhələyə vəsiqə qazanmış Azərbaycan millisi də növbəti sınağına məhz bu gün çıxıb.
Faiq Qarayevin yetirmələri növbəti mərhələyə vəsiqə uğrunda Hollandiya ilə mübarizə aparırdı. Qeyd edək ki, bu cütün qalibini 1/4 finalda İtaliya ilə qarşılaşma gözləyirdi. Hansı ki, qrup mərhələsində millimizlə eyni qrupdaydı və voleybolçularımıza 3:0 hesabıyla qalib gəlmişdi.
Yığmamız hollandlarla görüşün ilk setinə pis başlasa da, tezliklə özünü toparlayıb üstünlüyü ələ aldı. Nəticədə sona kimi üstünlüyünü qoruyan Qarayevin yetirmələri birinci seti qələbəylə başa vurdu. İkinci setdə isə millimiz çox yaxşı təsir bağışlayırdı. Hətta hamı voleybolçularımızın ikinci seti də qələbəylə bitirəcəyini gözlədiyi vaxtda, Qarayevin yetirmələri inanılmaz da olsa, 24:21 hesablı üstünlüyü əldən verərək məğlub oldular. Məhz belə üstünlüyü əldən vermələri voleybolçularımızın üçüncü setdəki çıxışına da təsirsiz ötüşmədi. Nəticədə hollandlar növbəti seti fərqli hesabla qazandılar. Elə dördüncü setdə də Hollandiya yığması komandamızın üzvlərinə heç bir şans yeri qoymayıb və ümumi nəticədə qələbəni təmin ediblər.
Voleybol
Avropa çempionatı
Pley-off mərhələsi
1/8 final
Azərbaycan – Hollandiya - 1:3 (25:23, 25:27, 16:25, 17:25)
1/8 final mərhələsinin digər oyunlarında aşağıdakı komandalar qarşılaşırlar: Çexiya – Fransa, Serbiya – Rumıniya, Türkiyə - İspaniya - 3:0.
