3 avqust 2011 11:12
Çempiondan transfer nöqtəsi (FOTO)
Azərbaycan çempionu “Rabitə” növbəti mövsümün hazırlıqlarını yekunlaşdırmaq üzrədi. Azerisport.az xəbər verir ki, paytaxt klubu yeni mövsüm öncəsi son transferini rəsmiləşdirib.
Belə ki, Amerika milli komandasının istedadlı ötürücüsü Meri Nelli Spayser növbəti mövsümdən etibarən Çempionlar Liqasının finalçısının şərəfini qoruyacaq. “Rabitə” yeni voleybolçusu ilə 1 mövsümlük müqavilə bağlayıb.
1987-ci il doğumlu oyun qurucusu 175 sm boya malikdi. Amerika yığmasının heyətinə 2005- ci ildən etibarən müxtəlif turnirlərdə cəlb olunan gənc voleybolçu ölkəsinin ən istedadlı ötürücülərindən biri hesab olunur. Son mövsümü Polşa çempionatının “Budqoş” komandasında keçirən Spayser inamlı oyunuyla kifayət qədər çoxlu azarkeş rəğbəti qazanıb.
Hal-hazırda yığmanın düşərgəsində olan voleybolçu 4-18 noyabr aralığında Yaponiyada milli komandalar arasında təşkil olunacaq Dünya Kubokundan sonra “Rabitə”nin düşərgəsinə qoşulacaq.
Bununla da “Rabitə”də çıxış edən amerikalı voleybolçuların sayı ikiyə yüksəlib. Xatırladaq ki, bundan öncə klub ötən mövsüm də “Rabitə”də oynayan digər amerikalı oyunçu Kimberli Qlassla da müqavilə yeniləmişdi. Kimberli Qlassın da Meri Spayserlə birgə 4-18 noyabr aralığında Yaponiyada milli komandalar arasında keçiriləcək Dünya Kubokundan sonra “Rabitə”nin düşərgəsinə qoşulması gözlənilir. Bu isə o deməkdi ki, “Rabitə” 8-14 oktyabrda Doha şəhərində təşkil olunacaq FİVB Klublararası Dünya Çempionatında bu iki voleybolçunun xidmətindən istifadə edə bilməyəcək.
