27 may 2011 13:44
Çempionumuz mundiala dəvət gözləyir
Son mövsüm Avropanın ən nüfuzlu klub turniri olan Çempionlar liqasında fəxri ikinci yerə sahib olan Rabitə Bakı komandası Beynəlxalq Voleybol Federasiyasından (FİVB) Klublararası Dünya Çempionatında iştirak etmək üçün xüsusi dəvətnamə gözləyir. Azerisport.az xəbər verir ki, 8-14 oktyabr 2011 cil il tarixlərində Qətər`in Doha şəhərində təşkil olunacaq Mundiala birbaşa vəsiqəni təmin edən 5 qitə çempionundan başqa, daha bir komandaya Beynəlxalq Voleybol Federasiyası tərəfindən xüsusi dəvətnamə təqdim edilir ki, “Rabitə” də buna ən real namizəd sayılan komandaların önündə gəlir.
Buna səbəb kimi ötən il analoji yarışa Çempionlar liqasında ikinci yer tutaraq dəvətnamə ilə qatılan “Fənərbaxça Acıbadem”in iştirakı nümunə göstərilə bilər. 2009/10 mövsümündə Volley Berqamoya Avropa Çempionlar Liqasının finalında yenilən Türkiyə komandası italyanlarla bərabər bu turnirdə iştirak hüququ qazanmış və məhz onlar bu turnirdə çempion titulunu qazanmışdılar.
Bu qanuna uyğunluğu nəzərə alaraq son illərin dəyişməz çempionu “Rabitə” bu turnirdə iştirak etmək hüququna məhz eyni uğuru təkrarladığına görə sahib çıxmalıdı. Artıq bununla bağlı Azərbaycan Voleybol Federasiyası CEV-ə müraciət edib. Bu müraciətə əsasən CEV prezidenti cənab André MEYER Beynəlxalq Voleybol Federasiyası qarşısında vəsatət qaldırıb.
