19 mart 2011 17:49
Azərreyl Uraloçkanı səfərdə də yenib, finala çıxdı (YENİLƏNİB)
Bu gün qadın voleybolçulardan ibarət “Azərreyl” klubu Çelenc Kubokunun yarımfinalında cavab matçına çıxıb. Azerisport.az xəbər verir ki, təmsilçimiz səfərdə Rusiyanın ən məşhur klubu olan “Uraloçka” ilə münasibətlərinə aydınlıq gətirib.
Qeyd edək ki, bu komandalar arasında Bakıda baş tutan qarşılaşma gərgin və maraqlı mübarizəyə səhnə olmuş, Vüqar Əliyevin yetirmələri çox çətin və dramatik qələbəyə (3:2) sevinmişdi. Lakin cavab görüşünün daha çətin keçəcəyi dəqiq idi. Komandamız finala vəsiqəni təmin etməklə çox böyük uğura imza ata bilərdi ki, sonda bu vəzifənin öhdəsindən layiqincə gəldi. Maraqlıdı ki, komandamızın qələbəsi gözləniləndən də asan başa gəldi.
Maraq üçün qeyd edək ki, vaxtilə bu komandalar avrokuboklarda bir dəfə də üz-üzə gəlmişdi və o zaman Rusiya klubu mərhələ adlayan tərəf olmuşdu. Təmsilçimiz bu sindroma da son qoydu və qisasını almış oldu.
Çekenc kuboku
Yarımfinal, cavab oyunu
19 mart
Uraloçka – Azərreyl - 1:3 (15:25, 21:25, 25:23, 19:25)
