10 fevral 2011 18:44
Rabitə: qızıl setdə qızıl qələbə (YENİLƏNİB)
Bu gün Azərbaycan çempionu “Rabitə” voleybolçu qadınlar arasında Çempionlar Liqasının cavab pley-off matçına çıxıb. Azerisport.az xəbər verir ki, təmsilçimiz doğma azarkeşlərin gözü önündə Çexiyanın “Modranska” klubuyla qarşılaşıb.
Qeyd edək ki, “rabitəçilər” pley-offa qrup lideri kimi çıxmışdılar. Rəqib isə ən yaxşı göstəriciyə malik qrup üçüncüsü kimi bu mərhələyə vəsiqə qazanmışdı. Məhz bu üzdən komandamız cütün aşkar favoriti göstərilirdi. Lakin ilk oyunda meydan amilindən maksimum yararlanan çexlər gərgin mübarizədən 3:2 hesablı qələbəylə ayrılmışdılar. Bu üzdən təmsilçimiz həmin yenilginin əvəzini çıxmaq üçün ilk 3 setdə itkisiz qələbə qazanmalı, nəhayət "qızıl set"də rəqibini sıradan çıxarmalıydı. Əks halda komandamız ÇL-dəki çıxışını erkən dayandırmalı olacaqdı. Xoşbəxtlikdən "Rabitə" rəqibinin çox ciddi müqaviməti ilə üzləşməsinə rəğmən, bu çətin vəzifənin öhdəsindən layiqincə gələ bildi və adını növbəti mərhələyə yazdırdı.
Maraq üçün onu da bildirək ki, komandamız növbəti mərhələd "Villa Korteze"ni (İtaliya) mübarizədən kənarlaşdıran "Bank PBS" (Polşa) ilə münasibətlərinə aydınlıq gətirməli olacaq.
Çempionlar Liqası
Pley-off mərhələsi (cavab oyunu)
17:00. Rabitə - Modranska - 4:0 (25:21, 25:23, 25:19, 15:11)
(İlk oyun – 2:3)
