Bu il voleybola getməyin yeri var – Loqan Tom gəlir! (FOTO)

Qadınlar arasında Azərbaycanın voleybol üzrə çempionu – Bakının «Rabitə» klubu amerikalı voleybolçu Loqan Tomu öz sıralarına qatmağa çox yaxındır.

azerisport.az saytı xəbər verir ki, bu transfer baş tutarsa, Natalya Məmmədovanın «rabitəçilərlə» müqavilə bağlaması xəbəri kölgədə qala bilər. Axı Natalyaya nə qədər rəğbətimiz olsa da, o, üç dəfə Olimpiadada iştirak etməyib və bunların birində bombardir adına layiq görülməyib. Hələ bu harasıdır!

29 yaşlı Olimpiya vitse-çempionu Loqan Tomun pərəstişkarlarının sayı-hesabı yoxdur. O, 2005-ci ildə dünyanın ən gözəl qadınlarının siyahısına düşüb. Bir çox maqazin tipli jurnallar üçün fotoçəkilişlərdə də iştirak edib. Loqanı əsas turnirlərdən azad vaxtda çimərlik voleybolu yarışlarında da izləmək olar.

Bir sözlə, bu səs-küylü transfer baş tutarsa, yeni mövsümdə «Rabitə»nin oyunlarına biletləri xeyli əvvəldən sifariş etmək lazım gələcək.