Rabitə - Azərreyl finalına doğru

Qadınlar arasında voleybol üzrə Azərbaycan superliqasının ikinci mərhələsinə yekun vurulub. Azerisport.az xəbər verir ki, Azərbaycan Voleybol Federasiyasının zalında keçirilən 6-cı turun qarşılaşmalarında Rabitə İqtisadçıya 3:0, Lokomotiv isə Azərreylə 3:1 hesabı ilə qalib gəlib. Nəticədə 10 xal toplayan “rabitəçilər” setlərin daha yaxşı fərqinə görə (16:7) Azərreyli (14:12) üstələyə biliblər. Lokomotiv 9 xalla üçüncü, İqtisadçı isə 7 xalla dördüncü yeri tutub.

Bununla Superliqanın Final mərhələsinin yarımfinal cütləri məlum olub. Rabitə 1/2 finalda İqtisadçını, Azərreyl isə Lokomotivi sınağa çəkəcək. Oyunların keçirilmə tarixi bir müddət sonra məlum olacaq.