Kubok Bakıda qalmayacaq
Bu gün Bakıda Avropa Voleybol Konfederasiyasının kubokunda “Dördlər finalı” start götürüb. Günün ilk qarşılaşmasında təmsilçimiz Rabitə İtaliyanın Yamamay kollektivi ilə qarşılaşıb.
Azerisport.az xəbər verir ki, matç ərzində qonaqlar daha təcrübəli və soyuqqanlı təsiri bağışlayıblar. Bəlkə də bu italyalı qızların Bakıya gələn gün soyuq və qarlı havaya düşməsi ilə əlaqədardır. Hər halda, Yamamay elə də böyük əziyyət çəkmədən oyunun ipini əlində saxlayırdı və “rabitəçilər” hər növbəti setdən sonra rəqibi yaxalamaq məcburiyyətində qalırdılar.
Nəticədə hər tay-brekdə həll olundu və məhz burada Yamamayın təcrübəsi sözünü dedi. Rabitə setin gedişini nəzarətdə saxlayırdı, lakin hesab 11:9 komandamızın xeyrinə olarkən buraxılan bir səhv və rəqibin ustalığı vəziyyəti 180 dərəcədə dəyişdi. 12:15, ümumi hesabda 2:3 (15:25, 25:22, 21:25, 25:17, 12:15).
…Rabitə finala çıxa bilmədi.
Onun rəqibi isə günün digər qarşılaşmasında – Uraloçka (Rusiya) – Srvena Zvezda (Serbiya) görüşündə məlum oldu. Adlar voleybolda çox böyük rol oynayır, amma indi halda yox. Daha təcrübəli və məşhur Uraloçka rəqibinə boyun əydi. Burada da gərgin mübarizə getdi və hər şey tay-brekdə həll olundu: 3:2 (21:25, 25:18, 25:23, 29:31, 15:11). Srvenan Zvezda finala çıxdı və Uraloçkanı Rabitəyə rəqib etdi.
Həlledici oyunlar sabah “Sərhədçi” idman kompleksinin zalında baş tutacaq. 3-cü yer uğrunda matçda Rabitə və Uraloçka, finalda isə Yamamay və Srvena Zvezda qarşılaşacaqlar.
