12 may 2013 00:41
Levan Kipiani Azərbaycanda səfərdədi
Gürcüstanın yeni təyin olunmuş idman və gənclərlə iş naziri Levan Kipiani mayın 11-də Azərbaycana gəlib. Azerisport.az xəbər verir ki, səfərin əsas məqsədi iki ölkə arasında gənclərlə iş və idman sahələrində əməkdaşlıq haqqında mövcud sazişlərin müddəalarının həyata keçirilməsi sahəsində əlaqələrin indiki vəziyyətini, onların genişləndirilməsi və gücləndirilməsi perspektivini müzakirə etməkdi.
Səfər çərçivəsində qonağın şəhərimizin idman infrastrukturu ilə və gənclərlə iş sahsində bir sıra layihələrlə tanış edilməsi nəzərdə tutulur. Nazir Levan Kipiani Azərbaycan xalıqnın ümummilli lideri Heydər Əliyevin məzarını və Şəhidlər Xiyabınını ziyarət edəcək, Dövlət Bayraq meydanında olacaq, Azərbaycan Respublikasının Gənclər və İdman Nazirliyində və Azərbaycanın Tələbə Gənclər Təşkilatları İttifaqında görüşlər keçirəcək. Bundan başqa qonağın taekvondo idman mərkəzi ilə tanışlığı və “İdeya” kampaniyası çərçivəsində “yer kürəsi uşaqların gözü ilə” uşaqların beynəlxalq fotomüsabiqəsinin yekun tədbirində iştirakı nəzərdə tutulub.
Levan Kipianinin ölkəmizə səfəri mayın 13-dək davam edəcək.
