22 dekabr 2011 13:11
İlin ən yaxşıları müəyyənləşdi
Azerisport.com dekabr ayının əvvəlindən start verdiyi Böyük Sorğuya yekun vurub. İlin ən yaxşılarını müəyyənləşdirən sorğunun nəticələri ilə sizi də tanış edirik.
İlin ən yaxşı komandasından başlayaq. Bu, 17 yaşadək futbolçulardan ibarət Azərbaycan millisi olub. U-17-yə 630 nəfər səs verib. “Qarabağ” ikinci (380), “Neftçi” üçüncü olub (236).
İlin ən yaxşı futbol məşqçisi də məhz U-7-nin çalışdırıcısı Təbriz Həsənov seçilib (599). “Qarabağ”ın baş məşqçisi Qurban Qurbanov ikinci (458) olub. Millimizin çalışdırıcısı Berti Foqts isə 248 səs toplayıb.
İlin ən yaxşı futbolçusu “Qarabağ”ın və milli komandamızın hücumçusu Rauf Əliyev seçilib (363). “Xəzər Lənkəran”ın yarımmüdafiəçisi Rahid Əmirquliyev ikinci (202), bu komandanın qapıçısı olan Kamrаn Ağayev isə üçüncü (137) olub.
Ən yaxşı idman federasiyası adını AFFA qazanıb. Bu quruma 266 səs verilib. İkinci yeri Azərbaycan Milli Avarçəkmə Federasiyas tutub (122). Voleybol Federasiyası üçüncü yerlə kifayətlənib (120).
İlin ən yaxşı tapıntısı futbol üzrə Azərbaycan millisinin və Almaniyanın “Freiburg” klubunun müdafiəçisi Ufuk Budaq seçilib (181). Boksçu Teymur Məmmədov ikinci (113), cüdoçu İlqar Muşkiyev üçüncü (47) olub.
Ən yaxşı idman komandası “Rabitə” seçilib (201). Basketbol üzrə Azərbaycan millisi ikinci (119), kişi şahmatçılardan ibarət yığmamız üçüncü (72) olub.
Ən yaxşı idman məşqçisi avarçəkmə yığmamızın çalışdırıcısı Aleksandr Kolıbelnikov seçilib (143). Yunan-roma güləşi üzə yığmamızın sabiq çalışdırıcısı Fərid Mansurov ikinci olub (104). Üçüncü yeri isə “basketbolçu” Elxan Əliyev tutub (85).
Ən yaxşı qadın idmançı Natalya Məmmədova olub (105 səs). İkinci yeri Mariya Stadnik tutub (89). Natalya Mustafayeva isə onlardan xeyli geri qalıb (47).
İlin ən yaxşı kişi idmançısı adını isə kanoeçilərimiz - Bezuqli-Prokopenko cütü qazanıb (709). İkinci yeri Valentin Demyanenko tutub (191). Yunan-roma güləşi üzrə yığmamızın üzvü Rövşən Bayramov isə üçüncülüklə kifayətlənib (133).
