Nenad Laloviç Dünya Güləş Birliyinin prezidenti seçildi
8-14 sentyabr 2014-cü il tarixdə Özbəkistanın paytaxtı Daşkənd şəhərində böyüklər arasında güləş üzrə Dünya çempionatı keçiriləcək. Azerisport.az xəbər verir ki, çempionatdan öncə Beynəlxaql Güləş Federasiyası - FİLA-nın növbəti Konqresi öz işinə başlayıb. Konqresin gündəliyində arxada qalan müddət ərzində görülən işlərin hesabatı, FİLA Prezidenti seçkiləri, İcraiyyə Komitəsinə yeni üzvlərin seçilməsi, FİLA-nın adının dəyişdirilməsi və digər məsələlər daxildir.
Azərbaycanı Konqresdə FİLA İcraiyyə Komitəsinin üzvü, Azərbaycan Güləş Federasiyasının I vitse-prezidenti Namiq Əliyev təmsil edir.
Tədbirdə quruma prezident seçkiləri keçirilib. Hazırda FİLA-ya başçılıq edən Nenad Laloviç yeganə namizəd kimi yekdilliklə yenidən quruma rəhbər seçilib. O, bu vəzifəni qarşıdakı 6 il ərzində icra edəcək.
Konqresdə eyni zamanda, uzun müddətdir müzakirəsi aparılan ad dəyişikliyi də baş tutub. Belə ki, Beynəlxalq Güləş Federasiyası - FİLA bundan sonra United World Wrestling - Dünya Güləş Birliyi adlanacaq.
Günün ikinci yarısında 2015-ci ildə keçiriləcək I Avropa Oyunları barədə Azərbaycan Güləş Federasiyasının baş katibi Əjdər Cəfərovun təqdimatı olacaq. (AGF)
