5 dekabr 2013 19:55
Ağayevin xatirəsinə Respublika turniri keçiriləcək
7-9 dekabr 2013-cü il tarixdə Masallı rayon Olimpiya İdman Kompleksində əməkdar məşqçi, SSRİ idman ustası Nadir Ağayevin xatirəsinə həsr olunmuş 1997-1998-ci il təvəllüdlü yeniyetmə yunan-Roma güləşçiləri arasında XIX ənənəvi Respublika turniri keçiriləcək. Azerisport.az xəbər verir ki, yeniyetmə güləşçilər 42, 46, 50, 54, 58, 63, 69, 76, 85 və 100 kq çəki dərəcəsində qüvvələrini sınayacaqlar.
Yarışın keçirilməsində əsas məqsəd yunan-Roma güləşi idman növünün inkişafı və kütləviliyinə nail olmaq, yarışın nəticələrinə əsasən yeniyetmə güləşçilər arasından perspektivli idmançıları aşkar etməkdir.
Turnir FİLA-nın mövcud qaydalarına əsasən keçiriləcək. Fəxri kürsünün ilk üçlüyündə qərar tutan güləşçilər təşkilatçılar tərəfindən müvafiq diplom, medal və pul mükafatı ilə təltif olunacaqlar.
