21 noyabr 2013 12:06
Qızıl qran-pri - Xeyrabadi üçün son şans?
Ötən il böyük ümidlərlə yunan-Roma güləşi üzrə milli komandanın başına gətirilən Cəmşid Xeyrabadi ona bəslənən etimadı hələ də doğrultmayıb. Azerisport.az xəbər verir ki, Azərbaycan komandası onun rəhbərlik etdiyi mötəbər yarışlarda hətta qızıl medala həsrətdi.
Martda Tiflisdə keçirilmiş Avropa çempionatında ən yüksək nəticə 1 gümüş mükafat olub. 2 pəhləvanımız isə 3-cü yer tutub. Macarıstanın paytaxtı Budapeştdə təşkil olunmuş dünya çempionatında iranlı mütəxəssisi şəxsi tələbəsi Saman Təhmasibi (84 kq) qurtardı. O, finalda Arazın o tayından olan həmvətəni Talib Nematpura uduzdu. 96 kq-da Şalva Qadabazde isə “bürünc”lə kifayətləndi.
Əldə etdiyimiz məlumata görə, 22-24 noyabrda Bakıda keçiriləcək FİLA-nın “Qızıl qran-pri”si Xeyrabadi üçün son şansdı. Çünki federasiya rəhbərliyi bütün milli komandalardan, özəlliklə yunan-Roma güləşindən yüksək nəticə tələb edir. Üstəlik, daim böyük uğurlara alışmış AGF bu mövsümdə “klasskilər”in çıxışından qəti narazıdı. 2015-ci ildə paytaxtda keçiriləcək ilk Avropa oyunlarında qarşıya yüksək hədəf qoymuş Güləş federasiyası gələn ildən böyük fəallıqla bu mötəbər yarışlara hazırlaşmağa başlayacaq; olimpiya çempionlarımızın o vaxtda əla formaya gətirilməsi üçün növbəti mövsümdən döyüşə atacaq.
Nəzərinizə çatdıraq ki, AGF iranlı mütəxəssisə hər şəraiti yaradıb və onun bütün tələbini yerinə yetirib. Misal üçün, yunan-Roma güləşi üzrə komandamızda məşqlər korpusu və tibbi heyət yalnız iranlılardan ibarətdi. Arazın o tayından olan güləş mütəxəssislərindən baş məşqçimiz barədə rəy almışıq. İranlılar həmyerliləri haqda deyiblər ki, o yaxşı insan olsa da, çalışdırıcı kimi səviyyəsi yüksək deyil. Cənublular yaxşı mütəxəssislərin ölkədən buraxılmadığını bildiriblər.
Qeyd edək ki, Cəmşid Xeyrabadi ötən ilin sonunda yunan-Roma güləşi üzrə millimizin baş məşqçi postunda Saleh Boranı əvəzləyib. Onunla 2 illik müqavilə imzalanıb. Türkiyəliyə gəlincə, bu mütəxəssisisin London olimpiadasındakı nəticəsi (1 gümüş və 1 bürünc) AGF-ni qane etmədiyindən, federasiya onunla müqaviləni artırmağı lüzum görməmişdi. Anadolulu mütəxəssis isə 2011-ci ilin payızında Fərid Mansurovun yerinə gəlmişdi. Olimpiya çempionumuzdan qabaq isə millimizə uzun müddət Elçin Cəfərov başçılıq edib. Pəhləvanlarımız məzh bu titullu məşqçinin dövründə tarixi uğurlara imza atmışdı.
