11 noyabr 2013 14:14
Bu gün Şərif Şərifovun 25 yaşı tamam olur
Bu gün London Yay Olimpiya Oyunlarının qızıl mükafatçısı Şərif Şərifovun ad günüdü. Azerisport.az xəbər verir ki, 84 kq çəkidə milli komandamızın lideri ötən il Dumanlı Albionda keçirilmiş “dördillik”də Toğrul Əsgərovdan (60 kq) sonra növbəti baş mükafata sahib çıxaraq, Azərbaycan idmanında tarix yazdı. Buna qədər olimpiyaçılarımız bu mötəbər oyunlarda 2 qızıl medal qazanmamışdılar.
Təcrübəli sərbəst güləşçi 1988-ci ilin noyabrın 11-də Dağıstan respublikasının Çarodin rayonunun Qunux kəndində dünyaya gəlib. Milliyətcə avar olan Şərif, pəhləvanlıq sənətinə ilk addımlarnı uşaq vaxtından Kizlərdə atıb. Sonra Mahaçqalaya gələrək, çalışmalarını Rusiyanın əməkdar məşqçisi Ənvər Məhəmmədhacıyevin rəhbərliyi ilə davam etdirib.
Şərifov 2008-ci ildən könüllu olaraq, Azərbaycan bayrağı altında çıxış etməyə başlayıb. Böyük nailiyyətləri də burada təsadüf edib. Bakıda şəxsi məşqçisi Firdovsi Umudovun rəhbərliyi ilə ilk ciddi uğuru 2009-cu ildə olub. Danimarkada təşkil olunmuş dünya çempionatında bürünc mükafata sahib çıxıb.
Bir il sonra Bakıda qitənin ən güclələrinin yarışında 2-ci yer tutub. 2011-ci ildə İstanbulda dünya çempionu adını qazanan Şərif, həm də London-2012-yə vəsiqə alıb. Olimpiadada uğuruna görə, ölkə başçısı İlham Əliyev tərəfindən “Şöhrət” ordeninə layiq görülüb.
Azersport.az saytının kollektivi titullu idmançını təbrik edir, ona can sağlığı, uzun ömür və karyerasında bundan sonra da uğurlar arzulayır.
