9 noyabr 2013 17:55
Yığmamızın üzvləri Dövlət Bayrağı meydanını ziyarət etdi (FOTOLAR)
Güləş üzrə Azərbaycan yığma komandalarının üzvləri, Olimpiya, Dünya və Avropa çempionları və mükafatçıları Dövlət Bayrağı Günü münasibətilə Dövlət Bayraq Meydanını ziyarət ediblər. Azerisport.az xəbər verir ki, Dövlət Bayraq Meydanı ilə tanışlıq zamanı güləşçilərə kompleksin yaranış tarixi barədə geniş məlumat verilib. Bildirilib ki, ölkə Prezidenti İlham Əliyevin 18 noyabr 2009-cu il tarixli Sərəncamı əsasında Azərbaycanda 9 noyabr tarixi Dövlət Bayrağı Günü kimi qeyd edilməyə başlanılıb. Həmçinin, 1 sentyabr 2010-cu il tarixində Dövlət Bayraq Meydanının açılış mərasimi həyata keçirilib.
Daha sonra güləşçilər Dövlət Bayrağı Muzeyini gəzərək, oradakı eksponatlarla, tarixən Azərbaycan xalqının sahib olduğu bayraqlarla və dövlət rəmzləri ilə yaxından tanış olublar.
Ümummilli lider Heydər Əliyevin və dövlət başçısı İlham Əliyevin prezident seçildikdən sonra andiçmə mərasimlərində öpdükləri prezident ştandartı (bayrağı), Silahlı Qüvvələrin qoşun növlərinin döyüş bayraqları, mərasim geyimləri və orta əsr Azərbaycan dövlətlərinin bayraqları, qədim silahlar güləşçilərin xüsusi marağına səbəb olub.
Azərbaycan Güləş Federasiyasının baş katibi, Olimpiya dərəcəli hakim Əjdər Cəfərov qatıldıqları mötəbər beynəlxalq yarışlarda bayrağımızı yüksəklərə qaldıran güləşçilərimizin Dövlət Bayrağı Meydanını ziyarət etməsinin onların milli-vətənpərvərlik ruhunda tərbiyə olunması, öz tariximizə və mədəniyyətimizə dərindən bələd olması məqsədini daşıdığını bildirib.
Olimpiya çempionları Toğrul Əsgərov və Şərif Şərifov olimpiada həyəcanını yenidən yaşadıqlarını, Azərbaycan bayrağını yüksəklərə qaldırdıqları üçün qürur hissi keçirdiklərini söyləyib, bundan sonra da yüksək əzmkarlıq nümayiş etdirərək bayrağımızın daim yüksəklərdə dalğalanması üçün çalışacaqlarını bildiriblər.
