18 sentyabr 2013 00:02
DÇ-2013-ün ikinci gününü medalsız başa vurduq (FOTOLAR)
Macarıstanın paytaxtı Budapeştdə güləş üzrə böyüklər arasında Dünya çempionatı davam edir. Azerisport.az xəbər verir ki, çempionatın ikinci günündə sərbəst güləş üzrə 60, 84 və 120 kq çəki dərəcəsində güləşçilər mübarizə aparıb.
Xatırladaq ki, Dünya çempionatının ilk günündə 96 kq çəkidə təmsilçimiz Xetaq Qazyumov gümüş medal qazanmışdı. Çempionatın ikinci gününü isə güləşçilərimiz medalsız tamamlayıblar.
60 kq çəkidə mübarizə aparan Hacı Əliyev iranlı rəqibi ilə gərgin qarşılaşmadan məğlub ayrılıb. İran güləşçisi yarımfinalda Rusiya təmsilçisinə uduzması ilə güləşçimiz medal şansını itirib.
1/16 final - Hacı ƏLİYEV - M.İsmaeilpurjuybari (IRI) (7:9)
84 kq çəkidə Aleksandr Qostiyev ilk görüşündə qazax təmsilçisindən üstün olsa da, növbəti görüşdə belaruslu rəqibinə məğlub olub. Belarus güləşçisi yarımfinalda Ukrayna təmsilçisi ilə görüşü məğlub başa vurub. Təmsilçimiz təsəlliverici görüşlərə qatıla bilməyib.
1/16 final - Aleksandr QOSTİYEV - Aslan Kaxidze (KAZ) (6:4)
1/8 final - Murat Baydarov (BLR) - Aleksandr QOSTİYEV (4:1)
120 kq çəkidə mübarizə aparan Cəmaləddin Məhəmmədov ilk görüşündə rahat qələbə qazansa da, son saniyələrdə ayağından zədələnib. İkinci görüşünü zədəli halda qələbə ilə başa vuran güləşçimiz daha sonra Ukrayna təmsilçisinə uduzub. Rəqibin finala yüksəlməsi Cəmaləddinə təsəlliverici görüşlərə qatılmaq hüququ verib. Ancaq güləşçimizin zədəsi ona görüşü tamamlamağa imkan verməyib.
1/16 final - Ruiz Flores (MEX) - Cəmaləddin MƏHƏMMƏDOV (2:10)
1/8 final - Çuluunbat Jargalsaixan (MGL) - Cəmaləddin MƏHƏMMƏDOV (3:4)
1/4 final - Cəmaləddin MƏHƏMMƏDOV - Alen Zaseev (UKR) (0:8)
Təsəlliverici görüş - Taha Akgül (TUR) - Cəmaləddin MƏHƏMMƏDOV (7:3)
