17 avqust 2013 11:58
DÇ-2013: Azərbaycan daha 2 medal qazandı
Bolqarıstanın Sofiya şəhərində güləş üzrə gənclərin Dünya çempionatı davam edir. Azerisport.az xəbər verir ki, çempionatın dördüncü günündə 48, 55, 63 və 72 kq çəkidə gənc qızların mübarizəsi baş tutub.
48 kq
1/16 finaldan mübarizəyə başlayan Kəmalə Əliyeva koreyalı Ju Yong Çeondan üstün (8:0) olub. 1/8 finalda güləşçimiz ABŞ təmsilçisi Cody Mae Pfau ilə görüşdən məğlub ayrılıb.
55 kq
Almaz İsmayılova 1/8 finaldan mübarizəyə qoşulub, ancaq çinli Mengyu Xie ilə gərgin keçən görüşdə təmsilçimiz uduzub.
63 kq
Raqnetta Qurbanzadə 1/8 finalda Rumıniya güləşçisi Laura Yelena Gavriliucu (11:6) məğlub edib. 1/4 finalda qazax Yekaterina Larionovanı da üstələyən güləşçimiz yarımfinala vəsiqə qazanıb. Yarımfinalda Raqnetta Qurbanzadə rusiyalı Svetlana Lipatova ilə görüşdən (2:3) məğlub ayrılıb. Təmsilçimiz həlledici görüşdə çinli Kuanya Manı tam üstünlüklə (7:0) məğlub edib və bürünc medal qazanıb.
72 kq
Səbirə Əliyeva 1/8 finalda macar Zsanet Nemethdən (8:1) üstün olub. 1/4 finalda güləşçimiz serbiyalı Una Svetlana Tubanı da tam üstünlüklə (7:0) məğlub edib. Yarımfinalda Səbirə Əliyeva yapon Rino Abe ilə gərgin keçən qarşılaşmada məğlub olub. Güləşçimiz bürünc medal uğrunda görüşdə Ukrayna təmsilçisi Veronika Pavlyuk üzərində təmiz qələbə (5:0) qazanıb.
Beləliklə, dünya çempionatında gənc qızların mübarizəsi başa çatıb. Yığma komandamızın üzvləri çempionatı 2 bürünc medalla tamamlayıb.
