15 avqust 2013 11:35
DÇ-2013-də 2-ci gün: Abbas Abdullayev gümüş, Orxan Nuriyev bürünc medal qazandı
Bolqarıstanın Sofiya şəhərində güləş üzrə gənclərin Dünya çempionatı davam edir. Azerisport.az xəbər verir ki, çempionatın ikinci günündə 55, 66, 84 və 120 kq çəkidə yunan-Roma güləşçiləri mübarizə aparıb.
Güləşçilərimiz günü 1 gümüş və 1 bürünc medalla başa vurub.
Ümumilikdə 1 gümüş və 3 bürünc medal qazanan yunan-Roma güləşçilərimiz 47 xal toplayaraq komanda hesabında Dünya ikincisi olub. Birinci yeri tutan Rusiya güləşçiləri 65 xal, üçüncü yeri tutan İran yığması isə 42 xal toplayıb.
55 kq
Sakit Quliyev mübarizəyə 1/16 finaldan başlayıb. Koreyalı Seung Hak Kim üzərində inamlı qələbə qazanan güləşçimiz 1/8 finalda erməni Gevorg Garibyanla görüşdən (0:3) məğlub ayrılıb.
66 kq
1/16 finaldan mübarizəyə başlayan Ruhin Mikayılov Ukrayna təmsilçisi Oleksandr Litvinovu tam üstünlüklə (8:0) məğlub edib. 1/8 finalda Serbiya güləşçisi Mate Nemesi (6:1) üstələyən təmsilçimiz 1/4 finala yüksəlib. Qazax Janibek Kandibayevl gərgin keçən görüşdən qalib ayrılan Ruhin yarımfinalda Rusiya güləşçisi Abuyazid Mantsigovla qarşılaşıb. Bu görüş güləşçimiz üçün uğurlu alınmayıb. Bürünc medal uğrunda həlledici görüşdə Yaponiya təmsilçisi Şohey Yabikuya da (2:3) uduzan Ruhin Mikayılov çempionatı beşinci sırada tamamlayıb.
84 kq
Orxan Nuriyev də 1/16 finaldan start götürüb. Macar Zoltan Keri üzərində (6:3) qələbə qazanan güləşçimiz 1/8 finalda qazax Rəşid Koçiyevdən (7:3) üstün olub. Ancaq növbəti mərhələdə iranlı Yusif Əhməd Qaderian (2:3) məğlub olub. İran güləşçisinin finala yüksəlməsi Orxana təsəlliverici görüşlərə qatılmaq şansı verib. Makedoniya güləşçisi Timur Xamikoyevə tam üstünlüklə (7:0) qalib gələn Orxan Nuriyev həlledici görüşə vəsiqə qazanıb. Türkiyə təmsilçisi Doğan Göktaşı (6:2) üstələyən güləşçimiz yığmamıza növbəti bürünc medalı qazandırıb.
120 kq
1/8 finalda Ukrayna təmsilçisi Vladislav Noşaçı (8:2) üstələyən Abbas Abdullayev 1/4 finalda iranlı Behnam Şajaeiağadamla qarşılaşıb. Gərgin keçən görüşdə (8:6) üstün olan güləşçimiz yarımfinala yüksəlib. ABŞ təmsilçisi Samuel Paul Stollu da məğlub edən Abbas finala vəsiqə qazanıb. Finalda rəqib Rusiya güləşçisi Sergey Semyonov olub. Təmsilçimiz gümüş medalla kifayətlənib.
