2 avqust 2013 12:26
Yığmamız dünya çempionatına hazırlığın son mərhələsində
20-25 avqust 2013-cü il tarixdə Serbiyanın Zrenyanin şəhərində yeniyetmə güləşçilər arasında Dünya çempionatı keçiriləcək. Azerisport.az xəbər verir ki, güləş üzrə yığma komandalarımız çempionata hazırlığı davam etdirir.
Yunan-Roma güləşi üzrə yeniyetmələrdən ibarət yığma komanda bu gündən etibarən İsmayıllı Olimpiya İdman Kompleksində təlim-məşq toplanışına başlayır. Böyük məşqçi Nurəddin Rəcəbov və məşqçi Vüqar Aslanovun rəhbərliyi altında yığma komandanın 20 üzvünün cəlb edildiyi təlimlər avqustun 17-dək davam edəcək.
Yeniyetmə sərbəst güləşçilər isə avqustun 6-dan etibarən Qusar Olimpiya İdman Kompleksində taktika və texnikanın təkmilləşdirilməsi üzrə növbəti təlim-məşq toplanışına başlayacaq. Böyük məşqçi Əsgərxan Novruzov, məşqçilər Vahid Məmmədov, Rövşən Hacıyev və Marian Stoyevin rəhbərlik etdiyi təlim-məşq toplanışında 22 güləşçi iştirak edəcək. Təlim-məşq toplanışı avqustun 20-dək davam edəcək.
Yeniyetmə qızlardan ibarət komandanın 5 üzvü məşqçi Rövşən Süleymanovun rəhbərliyi altında Ukraynanın Krivoy-Roq şəhərində birgə təlim-məşq toplanışındadır. İyulun 22-də başlayan təlimlər avqustun 5-də başa çatacaq.
