5 iyul 2013 13:55
Avropa ikincisi olan milli komandamız Bakıya qayıtdı (FOTO, VİDEO)
Makedoniyanın Skopye şəhərində keçirilən gənclər arasında Avropa çempionatını uğurla başa vuran yunan-Roma güləşi komandası Vətənə qayıdıb. Azerisport.az xəbər verir ki, komandanı H.Əliyev adına Beynəlxalq Hava Limanında AGF rəsmiləri, güləş azarkeşləri və media nümayəndələri qarşılayıb.
AGF baş katibi, Olimpiya dərəcəli hakim Əjdər Cəfərov qazanılan qələbə münasibətilə bütün komanda üzvlərini təbrik edib, onlara növbəti yarışlarda da uğurlar arzulayıb. "Ötən il gənclərin Avropa çempionatında ikinci, dünya çempionatında birinci olan komanda üzvlərinin əksəriyyətinin bu il böyüklər arasında mübarizə aparır. AGF rəhbərliyi tərəfindən diqqətdə saxlanılan "Yeniyetmə güləşçilərin inkişafı Proqramı" artıq öz bəhrəsini verir. Gənclər komandası demək olar ki, tam yenidən formalaşdırılıb. Ona görə də əldə olunan bu uğuru yüksək qiymətləndiririk".
Yığma komandanın böyük məşqçisi Şaban Donat yaxşı hazırlıq prosesi keçdiklərini və çempionata ciddi hazırlaşdıqlarını bildirib. Komanda hesabında ikinci nəticə göstərdiklərinə görə bütün güləşçilərə təşəkkür edən böyük məşqçi qarşıdan gələn dünya çempionatında da bu uğuru ən azı təkrarlamaq istədiklərini qeyd edib.
Xatırladaq ki, ümumilikdə 1 qızıl, 1 gümüş və 3 bürünc medal qazanan yunan-Roma güləşçilərimiz çempionatı uğurla başa vurub və komanda hesabında 52 xalla ikinci olub.
