3 may 2013 17:26
Naxçıvan Kubokunun püşkü atıldı (VİDEO, FOTOLAR)
4-5 may 2013-cü il tarixdə Naxçıvan şəhəri Olimpiya İdman Kompleksində Ümummilli Lider Heydər Əliyevin anadan olmasının 90-cı ildönümünə həsr olunmuş yunan-Roma güləşi üzrə gənclər arasında “Naxçıvan Kuboku” uğrunda ənənəvi beynəlxalq turnir keçiriləcək. Azerisport.az xəbər verir ki, artıq turnirə son hazırlıq işləri görülür.
Təşkilat Komitəsinin üzvləri komanda şəklində Naxçıvan Muxtar Respublikasında ezamiyyətdədir. Turnirin hazırlığı ilə bağlı ən xırda detallara diqqət yetirilir, yarana biləcək problemlər qısa zaman kəsiyində müəyyənləşdirilir və aradan qaldırılır. Bu gün turnirin püşkatma mərasimi də keçirilib.
Məlumat üçün bildirək ki, turnirin açılış mərasimi sabah saat 10.00-da başlayacaq. Açılış mərasiminin rəsmi hissəsində Naxçıvan Muxtar Respublikası Ali Məclisinin sədri cənab Vasif Talıbov, Azərbaycan Güləş Federasiyasının I vitse-prezidenti, FİLA İcraiyyə Komitəsinin üzvü cənab Namiq Əliyev çıxış edəcək, yarış iştirakçılarını salamlayacaq.
Daha sonra açılış mərasiminin bədii hissəsi başlayacaq. Bədii hissə başa çatdıqdan sonra yarımqruplar üzrə görüşlər start götürəcək.
