19 sentyabr 2012 14:21
Bakıda keçiriləcək Qran-Prinin mükafat fondu: 441 000 dollar
Xəbər verdiyimiz kimi, 21-23 sentyabr 2012-ci il tarixdə Bakıda ümummilli lider Heydər Əliyevin xatirəsinə həsr olunmuş güləş üzrə “Qızıl Qran Pri” beynəlxalq turnirinin final mərhələsi keçiriləcək. Azerisport.az xəbər verir ki, Heydər Əliyev adına İdman Konsert Kompleksində keçiriləcək turnirin proqramına əsasən sabah - sentyabrın 20-də görüşləri idarə edəcək hakimlərin seminarı və texniki iclas keçiriləcək.
İlk gün sərbəst, ikinci gün qadın, üçüncü gün isə yunan-Roma güləşçiləri xalça üzərinə çıxacaq.
Yarışlar hər gün saat 10.00-da, final görüşləri saat 17.00-da başlayacaq. Turnirin rəsmi açılış mərasimi sentyabrın 21-də saat 17.00-da baş tutacaq.
Artıq turnirin mükafat fondu da bəllidi. Belə ki, 26 ölkədən gələcək güləşçilər 441 min dollar uğrunda mübarizə aparacaqlar. Çempionlar 10 min, gümüş medalçılar 5 min, bürünc medal qazananlar isə 2 min dollar qazanacaqlar. Daha 2000 dollar isə məşqçilərə çatacaq.
