11 aprel 2012 19:03
Güləş Federasiyasına hədiyyə (FOTO)
Bu gün Yeni Azərbaycan Partiyası (YAP) Gənclər Birliyinin sədri Seymur Orucov Güləş Federasiyası ilə əməkdaşlıq çərçivəsində görüş keçirib. Azerisport.az xəbər verir ki, Federasiyanın baş katibi Əjdər Cəfərov və AGF idman şöbəsinin müdiri Yaqub Məmmədovla baş tutan görüşdə əməkdaşlıq haqqında fikir mübadiləsi aparılıb.
Görüş zamanı çıxış edən Seymur Orucov ölkədə idmana göstərilən qayğı haqda fikirlərini belə ifadə etdi: “Cənab Prezident İlham Əliyev ölkəmizdə bütün idman növlərinə olduğu kimi Güləşə də xüsusi önəm verir. 2012-ci il Prezidentimizin sərəncamı ilə “İdman ili” olunduqdan sonra Azərbaycanda bütün idman növlərinə xüsusi qayğı göstərilməyə başlanıldı. Bunun nəticəsidir ki, gənclərimiz həm regionda, həm də dünyanın mötəbər turnirlərində uğurla çıxış edir. Ümid edirik ki, Londonda keçiriləcək Yay Olimpiya Oyunlarında da idmançılarımız medallar qazanaraq ölkəmizə qayıdacaq. Bütün bu əldə olunan uğurlara görə Güləş Federasiyasının rəhbərliyinə və bu işdə dəstəyi olan bütün insanlara təşəkkür edirəm”.
Qeyd edək ki, 200 minə yaxın gənci öz ətrafında birləşdirən birliyin tərkibində müxtəlif idman növləri ilə məşğul olanların olduğunu qeyd edən Seymur Orucov güləşə xüsusi dəstək göstərəcəklərini deyib.
Azərbaycan Güləş Federasiyasının baş katibi, olimpiya dərəcəli hakim Əjdər Cəfərov YAP Gənclər Birliyinin idman federasiyaları ilə əməkdaşlıq təşəbbüsünü yüksək qiymətləndirdi və ölkə gənclərinin böyük əksəriyyətinin toplaşdığı qurum ilə gələcək fəaliyyət üçün hər cür əməkdaşlığa hazır olduqlarını bildirib:
“Azərbaycanda idman sürətlə inkişaf edən sahələrdən biridir. İdmançılarımız hər il mötəbər yarışlarda uğurlu çıxışları ilə ölkəmizə yüksək əyarlı medallar qazandırır. Təbii ki, bütün bunlar ölkə prezidenti, Milli Olimpiya Komitəsinin prezidenti cənab İlham Əliyevin bu sahəyə xüsusi diqqət və qayğısının nəticəsində mümkün olur. Qazanılan bu nailiyyətlərdə güləşçilərimizin payının çox olması isə Azərbaycan Güləş Federasiyası rəhbərliyinin həyata keçirdiyi məqsədyönlü fəaliyyətinin göstəricisidi”.
Görüşün sonunda Yeni Azərbaycan Partiyasının Gənclər Birliyinin sədri Seymur Orucov Güləş Federasiyasının baş katibi Əjdər Cəfərova üzərində xam neftlə güləş səhnəsi təsvir olunmuş şəkli xatirə hədiyyəsi olaraq təqdim edib. Baş katib isə öz növbəsində təşkilat sədrinə təşəkkürünü bildirib.
