11 mart 2012 00:01
Sərbəst və qadın güləşçilər AÇ-dəki çıxışını başa vurdular
Serbiyanın paytaxtı Belqradda keçirilən güləş üzrə Avropa çempionatında 4-cü yarış günü arxada qalıb. Azerisport.az xəbər verir ki, bu müddət sərbəst güləş üzrə kişi və qadınların gərgin mübarizəsi ilə yadda qalıb.
İlk 4 günün qısa xülasəsinə nəzər salsaq görürük ki, güləşçilərimiz 1 qızıl və 3 bürünc medal əldə edib. Qızıl medalı yığmamıza 60 kq çəki dərəcəsində mübarizə aparan sərbəst güləşçimiz Toğrul Əsgərov qazandırıb. Bürünc medallar isə müvafiq olaraq, Aleksandr Qostiyev (74 kq), Sona Əhmədli (59 kq) və Nadya Sementsovanın (67 kq) payına düşür.
Avropa çempionatının ilk günü yığma komanda üzvlərimizdən heç biri mükafatçılar sırasına düşə bilməyib. Çempionatın ikinci günündə Azərbaycan idmançıları medal hesabını açıblar.
60 kq çəkili sərbəst güləşçimiz Toğrul Əsgərov 1/8 finalda Türkiyə, 1/4 finalda isə Gürcüstan idmançısını məğlub edərək yarımfinala vəsiqə qazanıb. Yarışın bu mərhələsində Rumıniya təmsilçisindən aşkar üstün olan Toğrul həlledici qarşılaşmada bolqar rəqibinə 3 hissə davam edən mübarizənin yekununda qalib gələrək Avropa çempionu olub və bununla da sərbəst güləş yığmamıza ilk medalı qazandırıb.
59 kq çəki dərəcəsində çıxış edən qadın güləşçimiz Sona Əhmədli isə ilk görüşdə Ukrayna nümayəndəsinə uduzsa da, rəqibin finala çıxması güləşçimizə bürünc medal şansı yaradıb və Sona bundan lazımınca istifadə edib. Çernoqoriya güləşçisini məğlub etməklə medal görüşündə iştirak hüququna yiyələnən qadın pəhləvanımız son görüşdə Belarus idmançısından güclü olub və Avropa çempionatını bürünc medalla başa vurub.
74 kq çəkili sərbəst güləşçimiz Aleksandr Qostiyev ilk görüşdə Polşa, daha sonra isə Fransa və Ermənistan idmançılarını məğlub edərək yarımfinala vəsiqə qazanıb. Yarışın bu mərhələsində Gürcüstan təmsilçisinə məğlub olan güləşçimiz bürünc medal uğrunda görüşdə Türkiyə güləşçisindən üstün olaraq Avropa çempionatının bürünc medalına sahib olub.
67 kq çəkili qadın güləşçimiz Nadya Sementsova isə mübarizəyə türkiyəli rəqibini məğlub etməklə başlayıb. O daha sonra Bolqarıstandan olan rəqibini üstələyib və yarımfinala çıxıb. Burada ukraynalı idmançıya uduzan Sementsova üçüncü yer uğrunda qarşılaşmada Rusiya təmsilçisinə qalib gələrək Avropa çempionatını üçüncü yerdə başa vurub.
