8 mart 2012 00:28
Azərbaycan AÇ-də ilk qızıl medalına sevindi
Serbiyanın paytaxtı Belqradda güləşçilər arasında Avropa çempionatı start götürüb. Azerisport.az xəbər verir ki, yarışın ilk günü bahadırlarımız üçün uğursuz olub. Belə ki, mübarizə meydanına çıxmış sərbəst güləşçilər - Emin Əzizov (66 kq) ilə Novruz Temrezov (96 kq) və qadın pəhləvan Marziget Baqomedova mükafatçılar sırasına düşməyiblər. Adı çəkilən milli komanda üzvlərindən yalnız Novruz fərqlənib. O, yekunda 5-ci yer tutub.
Turnirin ikinci günündə isə 60 kq-da güləşən Toğrul Əsgərov Türkiyə, Gürcüstan və Rumıniyadan olan həmkarlarını üstələyərək, finala yüksəlib. Həlledici görüşdə gənc bahadırımız bolqarıstanlı Anatoli Quydeanı məğlub edərək, qitə çempionu adını qazanıb.
Digər sərbəst güləşçimiz Qalib Əliyev (55) uğursuz nəticə göstərib. Qadınların mübarizəsində Fatimə Baqomedova (51 kq) 5-ci yerə çıxıb. Titullu idmançımız Sona Əhmədli (59 kq) komandamızı medalsız qoymayıb. Bürünc mükafat uğrunda görüşdə qitə çempionu belaruslu Nadejda Mixalkovanı üstələyib.
