13 oktyabr 2011 16:14
Azərbaycan Qitələrarası kubokda 3-cü oldu
Dağıstanın Xasavyurt şəhərində keçirilən sərbəst güləş üzrə Qitələrarası Kubok beynəlxalq turniri başa çatıb. Azerisport.az xəbər verir ki, turnirdə iştirak edən Azərbaycan yığma komandası üçüncü yeri tutub.
On komandanın mübarizə apardığı turnirdə yığmamız Dağıstan, Türkiyə və Ukrayna ilə bir yarımqrupda yer alıb. Qrupda ikinci yeri tutan sərbəst güləş üzrə yığmamız digər yarımqrupun ikincisi Gürcüstan ilə üçüncülük görüşünə çıxıb. Yekun hesabda (4:3) qalib gələn Azərbaycan güləşçiləri Qitələrarası Kubok beynəlxalq turnirini üçüncü yerdə tamamlayıblar.
Baş məşqçi Saypulla Absaidov və böyük məşqçi Firdovsi Umudovun rəhbərliyi altında yığmamızın heyətində Mahmud Məhəmmədov, Qalib Əliyev (hər ikisi 55 kq), Ağahüseyn Mustafayev (60 kq), Emin Əzizov (66 kq), Aleksandr Qostiyev (74 kq), Novruz Temrezov (84 kq), Hacı Əlicanov (96 kq) və Əli İsayev (120 kq) yer almışdılar.
Görüşlərin idarə edilməsində beynəlxalq dərəcəli hakim İntiqam Alıyev Azərbaycanı təmsil edib. Olimpiya dərəcəli hakim Hicran Şərifov isə beynəlxalq turnirdə FİLA (Beynəlxalq Güləş Federasiyaları Assosiasiyası) nümayəndəsi kimi turnirə nəzarət edib.
